ప్రజారాజ్యం కార్యాలయంలో చిరంజీవి క్యాంప్

By Srinivas

Published: Wednesday, August 31, 2011, 10:03 [IST]

హైదరాబాద్: ప్రజారాజ్యం పార్టీని కాంగ్రెసు పార్టీలో విలీనం చేయడంతో ఆ పార్టీ ఎమ్మెల్యేలకు ఇక నుండి గాంధీ భవనం పార్టీ కార్యాలయంగా మారనుంది. తిరుపతి శాసనసభ్యుడు చిరంజీవికి సైతం గాంధీ భవనమే పార్టీ కార్యాలయం. అధికారికంగా ఏం చేసినా వారు గాంధీ భవనంలోకి రావాల్సిందే. దీంతో ప్రజారాజ్యం పార్టీ కార్యాలయం బోసి పోనుంది. అయితే ప్రజారాజ్యం పార్టీ కార్యాలయం బోసి పోకుండా, దానిని ఉపయోగించుకునే ప్రయత్నాలు చిరంజీవి చేస్తున్నట్టుగా తెలుస్తోంది.

ప్రజారాజ్యం పార్టీని ఇక నుండి చిరంజీవి తన క్యాంపు కార్యాలయంగా ఉపయోగించుకోవాలనుకుంటున్నట్లుగా సమాచారం. కార్యకర్తలకు అందుబాటులో ఉండేందుకుగాను ఇన్నాళ్లూ పిఆర్పీ కార్యాలయంగా ఉన్న దానిని తన క్యాంపు కార్యాలయంగా ఉపయోగించుకోవాలని చిరు నిర్ణయించుకున్నారట. వచ్చే నెల నుండి ప్రతిరోజ ఈ కార్యాలయంలో గంట పాటు కార్యకర్తలకు అందుబాటులో ఉంటారట. మరో విషయం పిఆర్పీ కార్యాలయంలో కొత్తగా మాజీ ప్రధాని ఇందిర, రాజీవ్ చిత్రపటాలు ఏర్పాటు చేశారు.

Published On August 31, 2011