ఎపికి గాంధేయవాదం చాలా అవసరం: ఆజాద్

By Srinivas

Published: Sunday, September 11, 2011, 16:41 [IST]

హైదరాబాద్: ఆంధ్ర ప్రదేశ్‌కు గాంధేయవాద అవసరం ఆవశ్యమని రాష్ట్ర వ్యవహారాల ఇంచార్జ్ గులాం నబీ ఆజాద్ ఆదివారం అన్నారు. ప్రస్తుత పరిస్థితుల్లో దేశంలో గాంధేయవాదం చాలా అవసరం అన్నారు. అహింసా, గాంధీ పద్ధతులు రాష్ట్రానికి, దేశానికి ఎంతో ఉపయోగపడతాయన్నారు. గాంధీజీ ఆశయ సాధనలను విద్యార్థులకు తెలిసేలా ప్రభుత్వం మరిన్ని చర్చలు చేపట్టాలని ముఖ్యమంత్రి కిరణ్ కుమార్ రెడ్డి ఆజాద్ సూచించారు. నిజాయితీ, అహింసా ప్రస్తుత కాలంలో ఎక్కువగా అవసరం ఉందన్నారు.

విద్యార్థులలో గాంధేయవాదాన్ని పెంపొందింపజేసేందుకు ప్రభుత్వం కృషి చేయాలన్నారు. పాఠశాలలో వ్యాసరచన పోటీలు నిర్వహించి అద్బుత ప్రతిభ కనబర్చిన వారికి బహుమతులు ఇవ్వాలన్నారు. తాను జమ్ము కాశ్మీర్ ముఖ్యమంత్రిగా ఉన్న సమయంలో సత్యం, అహింసలను పాఠ్యాంశాలుగా పెట్టినట్లు చెప్పారు. ఆంధ్రప్రదేశ్‌లోనూ పాఠ్యాంశాలు పెట్టాలని సిఎంను కోరారు. కాగా బైక్ యాక్సిడెంటులో గాయపడ్డ ఎంపీ అజహరుద్దీన్ తనయుడు అయాజుద్దీన్ చూసేందుకు ఆజాద్ వెళ్లారు. ఆయనతో పాటు సిఎం కిరణ్, పిసిసి చీఫ్ బొత్స సత్యనారాయణ, మంత్రి దానం నాగేందర్ వెళ్లిన వారిలో ఉన్నారు.

Published On September 11, 2011