అందుకే కోర్టుల చుట్టూ తిరుగుతున్నాయ్: వైయస్ జగన్

By Srinivas

Published: Sunday, September 11, 2011, 17:09 [IST]

విజయవాడ: అధికార కాంగ్రెసు, ప్రతిపక్ష తెలుగుదేశం పార్టీలు తనను ఇబ్బంది పెట్టాలని రెండు పార్టీలు కుమ్మక్కై కోర్టుల చుట్టూ తిరుగుతున్నాయని వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆదివారం కృష్ణా జిల్లాలోని తన ఓదార్పుయాత్రలో ఆరోపించారు. నైతిక విలువలు గాలికి వదిలేసిన కాంగ్రెసు పార్టీ కేంద్ర, రాష్ట్రాల్లో రెండుసార్లు పార్టీని అధికారంలోకి తీసుకు వచ్చిన దివంగత ముఖ్యమంత్రి, తన తండ్రి వైయస్ రాజశేఖర రెడ్డిపై బురద జల్లే ప్రయత్నాలు చేస్తున్నాయన్నారు.

జన నేతను చూసి ప్రజలు ఓట్లు వేసి గెలిపించారన్నారు. వైయస్ తీసుకు వచ్చిన అధికారాన్ని అనుభవిస్తున్న కాంగ్రెసు ఇప్పుడు ఆ వైయస్ పట్లనే అన్యాయంగా వ్యవహరిస్తోందన్నారు. వైయస్ సంక్షేమ పథకాలకు ప్రస్తుత కాంగ్రెసు ప్రభుత్వం తూట్లు పొడుస్తోందన్నారు. రైతుల సమస్యలను గాలికి వదిలేశారని ఆరోపించారు. కాగా న్యూఢిల్లీ పర్యటన అనంతరం రాష్ట్రానికి తిరిగి వచ్చిన జగన్ కృష్ణా జిల్లాలోని గన్నవరం నియోజకవర్గంలో ఓదార్పుయాత్ర చేపట్టారు.

Published On September 11, 2011