చంద్రబాబూ! హెరిటేజ్ రాసిస్తావా: బాలినేని సవాల్

By Srinivas

Published: Wednesday, September 14, 2011, 12:06 [IST]

ఒంగోలు/తిరుపతి: తెలుగుదేశం పార్టీ అధినేత నారా చంద్రబాబు నాయుడుకు మాజీ మంత్రి, వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు శాసనసభ్యుడు బాలినేని శ్రీనివాస్ రెడ్డి బుధవారం సవాల్ విసిరారు. బాబు ఆస్తులెంతో నా ఆస్తులెంతో తేల్చుకుందామన్నారు. నా ఆస్తులన్నీ చంద్రబాబుకు రాసిస్తాను, ఆయన ఒక్క హెరిటేజ్ నాకు రాసిస్తే చాలన్నారు. తన తాతల నుండే తనకు వందల ఎకరాలు ఉందన్నారు. కానీ చంద్రబాబు రెండు ఎకరాల ఆసామి నుండి రెండువేల కోట్లకు ఎదిగారన్నారు. తాను ఎలాంటి అక్రమాలకు పాల్పడలేదని కాణిపాకం గుడిలో ఒట్టేస్తానని చంద్రబాబు అందుకు సిద్ధమేనా అని సవాల్ చేశారు.

బిజెపియేతర ప్రభుత్వం అన్న జగన్ వ్యాఖ్యలపై రాజంపేట శాసనసభ్యుడు అమర్నాథ్ రెడ్డి తిరుపతిలో వివరణ ఇచ్చే ప్రయత్నాలు చేశారు. బిజెపియేతర ప్రభుత్వం ఉంటే కాంగ్రెసుతో పాటు థర్డ్ ఫ్రంట్ కూడా వస్తుందన్నారు. సిబిఐ దర్యాఫ్తు తర్వాత జగన్ క్రేజ్ మరింత పెరిగిందన్నారు. మంత్రి డిఎల్ రవీంద్రా రెడ్డికి ప్రజలు గత ఎన్నికల్లోనే బుద్ధి చెప్పారన్నారు. సికింద్రాబాద్ శాసనసభ్యురాలు జయసుధ రాజీనామా చేయనప్పటికి జగన్ వెంటే ఉన్నారన్నారు.

Published On September 14, 2011