గాలి కోసం వైయస్సార్ బెదిరించారు: కల్లోల్ బిశ్వాస్

By Srinivas

Published: Wednesday, September 14, 2011, 15:16 [IST]

హైదరాబాద్: కర్నాటక మాజీ మంత్రి గాలి జనార్ధన్ రెడ్డి తరఫున ప్రత్యర్థులను దివంగత ముఖ్యమంత్రి వైయస్ రాజశేఖర రెడ్డి బెదిరింపులకు గురి చేశారని నాటి అటవీ శాఖ అధికారి కల్లోల్ బిశ్వాస్ బుధవారం ఓ టీవీ ఛానల్ కార్యక్రమంలో చెప్పారు. గాలి అక్రమాలను అడ్డుకునే ప్రయత్నాలు చేసినందుకు ఆయనతో పాటు ఆయన అనుచరులు తనను వెంటాడారు, వేధించారన్నారు. నాపై ఎస్సీ, ఎస్టీ అట్రాసిటీ కేసు సైతం పెట్టారన్నారు. రెండు రాష్ట్రాల సరిహద్దులను చెరిపేసి భారీ మైనింగుకు పాల్పడ్డారన్నారు. తాను వారి ప్రలోభాలకు లొంగలేదన్నారు. అందుకే తనకు ప్రాణ భయం ఉందన్నారు. వారికి భయపడే ఇన్నాళ్లూ అజ్ఞాతంలో ఉన్నట్టు చెప్పారు.

గాలి కోసం వైయస్సార్ చెప్పినట్టుగా తలాడించిన సీనియర్ అధికారులు ఇప్పుడు విచారణ ఎదుర్కొంటున్నారన్నారు. గాలి గనుల్లో అనేక నిజాలు పూడుకు పోయాయన్నారు. మైనింగ్ అక్రమాలకు బయట పడతాయని సర్వే ఆఫ్ ఇండియా సర్వేను కూడా వైయస్ అడ్డుకున్నారన్నారు. సర్వేను వ్యతిరేకించారన్నారు. దీనిపై తాను కేంద్రానికి సైతం లేఖ రాశానన్నారు. మైనింగ్ ఎగుమతుల్లోనూ గోల్ మాల్ జరిగిందన్నారు. మైనింగ్ పైన అనుమానాలు రావటంతో తాను గ్రౌండ్ లెవల్లో పరిశోధన చేశానన్నారు. ఒఎంసి నుంచి ఆర్ఆర్ గ్లోబల్ లీజుకు తీసుకుందని దీనికి అటవీ శాఖ కూడా అనుమతులిచ్చిందన్నారు.

సన్ ఇన్ ఫ్రాను ఆర్ఆర్ గ్లోబల్ ఆక్రమించుకుందని ఆరోపించారు. కొందరు అధికారులు గాలి పర్మిట్ల కోసం సహకరించారన్నారు. గాలికి సహకరించిన మరికొందరు అధికారులు తనను ఇరికించే ప్రయత్నాలు కూడా చేశారన్నారు. అటవీ శాఖ ఉల్లంఘనల పైన నోటీసులు ఇచ్చినట్లు చెప్పారు. కొన్ని కంపెనీలపై వైయస్ స్వయంగా ఒత్తిడి తెచ్చిన సందర్భాలూ ఉన్నాయన్నారు. సిబిఐ తనను సాక్షిగా పేర్కొందన్నారు. సిబిఐ తనను విచారించిందన్నారు. సిబిఐ దర్యాఫ్తులో అన్నీ బయటపడతాయన్నారు.

Published On September 14, 2011