ఇక కాంగ్రెసు, టిడిపి ప్రజాప్రతినిధులే టార్గెట్

హైదరాబాద్: తెలుగుదేశం, కాంగ్రెసు పార్టీల ప్రజా ప్రతినిధులే లక్ష్యంగా తెలంగాణ రాజకీయ ఐక్య కార్యాచరణ సమితి కార్యాచరణకు సిద్ధమయ్యేలా కనిపిస్తోంది. మంగళవారం ప్రారంభమైన సకల జనుల సమ్మెకు తెలంగాణ ప్రజల నుండి అనూహ్య మద్దతు లభించింది. మొదటి రోజు సింగరేణి కార్మికులు, టిఎన్జీవోలు, ప్రైవేట్ కళాశాల ఉద్యోగులు తదితరులు పాల్గొన్నారు. సచివాలయంలోనూ తెలంగాణ ఉద్యోగులు విధులు బహిష్కరించారు. మరోవైపు సిద్ధాంత పరంగా జెఏసితో విభేదిస్తున్నప్పటికీ తెలుగుదేశం, కాంగ్రెసు తదితర పార్టీలు పూర్తి మద్దతు పలికాయి. దీంతో ఉద్యమం తీవ్ర దశలో ఉన్నప్పుడే రాజ్యాంగ సంక్షోభానికై ప్రజా ప్రతినిధుల రాజీనామాలే లక్ష్యంగా ఐకాస కార్యాచరణ రూపొందించే అవకాశాలు కనిపిస్తున్నాయి.

మంగళవారం జెఏసి చైర్మన్ కోదండరామ్ మాట్లాడుతూ సకల జనుల సమ్మె విజయవంతమైందని, ఇప్పటికైనా కాంగ్రెసు, టిడిపి ప్రజా ప్రతినిధులు రాజీనామాలు చేయాలని పిలుపునిచ్చారు. సమ్మె ఈ దశలో ఉన్న సమయంలోనే ప్రజా ప్రతినిధులపై రాజీనామా ఒత్తిడి తీసుకు రావాలని జెఏసి భావిస్తున్నట్లుగా తెలుస్తోంది. అలా అయితేనే వారు రాజీనామాలకు ముందుకు వస్తారని భావిస్తున్నట్లుగా కనిపిస్తోంది. బుధ, గురువారం తెలంగాణ వ్యాప్తంగా సినిమా హాళ్ల బంద్, ఆ తర్వాత ప్రైవేట్ స్కూల్ విద్యార్థుల మానవహారం, 16 నుండి ప్రభుత్వ ఉద్యోగుల సమ్మె ఇలా వరుసగా జెఏసి కార్యాచరణ ప్రకటించింది. రోజు రోజుకు సమ్మెకు మద్దతు పెరుగుతుందని జెఏసి భావిస్తోంది. ఇలాంటి సమయంలోనే ప్రజా ప్రతినిధులపై రాజీనామా ఒత్తిడి తేవాలని యోచిస్తున్నట్లుగా తెలుస్తోంది.

English summary

Telangana Joint Action Committee is thinking to put resignation pressure on Telugudesam and Congress party leaders.