పోటీగా సమైక్యాంధ్ర విద్యార్థి గర్జన, 30 మంది ఎమ్మెల్యేలు

By Srinivas

Published: Wednesday, September 14, 2011, 10:09 [IST]

తిరుపతి: తెలంగాణ ప్రాంతంలో సకల జనుల సమ్మె ఆందోళన నేపథ్యంలో సమైక్యాంధ్ర విద్యార్థి ఐక్య కార్యాచరణ సమితి చిత్తూరు జిల్లాలోని తిరుపతిలో సమైక్యాంధ్ర విద్యార్థి గర్జనను బుధవారం నిర్వహిస్తోంది. ఈ గర్జనకు సీమాంధ్రకు చెందిన సుమారు ముప్పై మంది ప్రజా ప్రతినిధులు వస్తున్నట్లుగా తెలుస్తోంది. సమైక్యాంధ్ర రాజకీయ కన్వీనర్ సాకె శైలజానాథ్, తెలుగుదేశం పార్టీ శాసనసభ్యుడు సోమిరెడ్డి చంద్రమోహన్ రెడ్డి, ఎమ్మెల్యే అమర్నాథ్ రెడ్డి, వివేకానంద రెడ్డి, ఎన్టీఆర్ టిడిపి అధ్యక్షురాలు లక్ష్మీ పార్వతి తదితరులు హాజరు కానున్నట్టుగా తెలుస్తోంది. స్థానిక కాంగ్రెసు, తెలుగుదేశం, వైయస్సార్ కాంగ్రెసు పార్టీ నేతలు రానున్నారు.

ఈ సందర్భంగా విద్యార్థులు మాట్లాడుతూ 14ఎఫ్ రద్దు వల్ల సీమాంధ్ర విద్యార్థులు నష్ట పోతున్నారన్నారు. ఇలాంటి వాటి వల్ల తాము తమిళనాడు, కర్నాటకకు తప్ప ఉద్యోగాల కోసం హైదరాబాద్ పోయే పరిస్థితి కనిపించడం లేదన్నారు. తెలంగాణ ఉద్యమం రాజకీయ లబ్ధికోసం జరుగుతోందన్నారు. కాగా విద్యార్థి గర్జన కృష్ణతేజ కళాశాలలో జరుగుతుంది. ఈ సభకు ఇరవై ఐదు వేల మంది విద్యార్థులు రానున్నారని తెలుస్తోంది.

Published On September 14, 2011