విభజన కాదు, ఉన్నదే కోరుతున్నాం: కోమటిరెడ్డి

హైదరాబాద్: తాము రాష్ట్ర విభజన కోరడం లేదని ఇంతకు ముందు ఉన్న రాష్ట్రానే ఇవ్వమంటున్నామని మంత్రి కోమటిరెడ్డి వెంకట్ రెడ్డి శుక్రవారం అన్నారు. ఈ విషయాన్ని సీమాంధ్ర ప్రజా ప్రతినిధులు అర్థం చేసుకోవాలన్నారు. తెలంగాణ కోసం నాలుగు రోజులుగా జరుగుతున్న సకల జనుల సమ్మెలో తాను సైతం పాల్గొంటానని చెప్పారు. ఉద్యమం తీవ్రంగా ఉన్న ప్రస్తుత పరిస్థితుల్లో తెలంగాణ కోసం ఇప్పుడు వెనుకడుగు వేస్తే భవిష్యత్తులో తెలంగాణ ప్రజలు బానిసలుగా బ్రతకాల్సిన పరిస్థితి ఉంటుందని హెచ్చరించారు. 30వ తారీఖులోగా తెలంగాణపై కేంద్రం నుండి సానుకూల ప్రకటన వస్తుందని ఆయన ఆశాభావం వ్యక్తం చేశారు. లేదంటే ప్రజాక్షేత్రంలోకి వెళతామన్నారు.

సీమాంధ్ర ప్రజా ప్రతినిధులు అనవసరంగా రెచ్చగొట్టవద్దన్నారు. తెలంగాణ ప్రజలు కన్నెర్ర జేస్తే మంత్రి టిజి వెంకటేశ్ తెలంగాణ ప్రాంతంలో అడుగు పెట్టరన్నారు. మంత్రి, ఏడు సూత్రాల కమిటీ చైర్మన్ సాకె శైలజానాథ్ ఓ బచ్చా అన్నారు. ఆయన తెలిసీ తెలియక మాట్లాడుతున్నారన్నారు. మంత్రులు ముఖేష్ గౌడ్, దానం నాగేందర్, ఉప ముఖ్యమంత్రి దామోదర రాజనర్సింహలను తెలంగాణ నేతలుగా పరిగణించడం లేదన్నారు.

English summary

Minister Komatireddy Venkat Reddy said today that Telanganites are not demanding for state divide. He said that we are demanding existing Telangana state.