భూకంపానికి మొత్తం 11 మంది మృతి

By Pratap

Published: Sunday, September 18, 2011, 21:36 [IST]

న్యూఢిల్లీ: భారతదేశంలోని ఉత్తర, ఈశాన్య ప్రాంతాలను భూప్రకంపనలు తాకాయి. సిక్కిం - నేపాల్ సరిహద్దు కేంద్రంగా భూకంపం చోటు చేసుకుంది. ఇది రిక్టర్ స్కేలుపై 6.8గా నమోదైంది. గ్యాంగ్‌టక్ పర్వత శ్రేణుల్లో భూకంపం కేంద్రం నమోదైంది. సిక్కిం పర్వతశ్రేణుల్లో చోటు చేసుకున్న భూకంపం వల్ల న్యూఢిల్లీ, బీహార్, జార్ఖండ్, అసోం, బెంగాల్ రాష్ట్రాల్లో ప్రకంపనలు చోటు చేసుకున్నాయి. సిక్కిం కేంద్రంగా తాకిన భూకంపం వల్ల మొత్తం 11 మంది మరణించారు. పలువురు గాయపడ్డారు. సిక్రింలోని గ్యాంగ్‌టాక్ కేంద్రంగా భూకంపం తాకింది. ఆ ప్రాంతంలో తీవ్ర నష్టం వాటిల్లినట్లు సమాచారం. మృతుల్లో ఒక పాప ఉన్నట్లు సిక్కిం ప్రధాన కార్యదర్శి కర్మ గైయాస్టో చెప్పారు. ప్రకంపనల వల్ల భీతిల్లిన ప్రజలు ఒక్కసారిగా బయటకు రావడంతో జరిగిన తొక్కిసలాటలో బీహార్‌లో భాగల్పూర్ జిల్లాలో ఓ వ్యక్తి మరణించినట్లు తెలుస్తోంది. సిక్కింలో నలుగురు, నేపాల్‌లో ఐదుగురు, బీహార్‌లోని భాగల్పూర్ జిల్లాలో ఇద్దరు మరణించినట్లు సమాచారం.

భూకంపం వల్ల పెద్దగా నష్టం జరగలేదని తెలుస్తోంది. భూమి 10 నుంచి 15 సెకన్ల పాటు కంపించినట్లు చెబుతున్నారు. ఈ ప్రకంపనలు ఆదివారం సాయంత్రం 6 గంటల 11 నిమిషాలకు చోటు చేసుకున్నాయి. బీహార్‌లో ప్రకంపనలు రావడంతో ప్రజలు ఇళ్లలోంచి బయటకు పరుగులు తీశారు. ఉత్తరప్రదేశ్‌లోని లక్నోలో కూడా ప్రకంపనల ప్రభావం కనిపించింది. వస్తువులు టకటక కొట్టుకున్నాయని చెబుతున్నారు.

Published On September 18, 2011