సింగరేణి కార్మికుల ఆర్ధరాత్రి అరెస్టు, విడుదల

By Srinivas

Published: Sunday, September 18, 2011, 11:53 [IST]

కరీంనగర్: ప్రత్యేక తెలంగాణ రాష్ట్ర ధ్యేయమే లక్ష్యంగా సకల జనుల సమ్మెలో పాల్గొంటున్న పలువురు సింగరేణి కార్మికులను శనివారం అర్ధరాత్రి అకస్మాత్తుగా అరెస్టు చేయడం తీవ్ర ఉద్రిక్తతకు దారి తీసింది. సమ్మెలో సింగరేణి కార్మికులు అందరూ పాల్గొనడంతో బొగ్గు నిలిచి పోయింది. రామగుండంలోని ఎన్టీపీసిలో విద్యుదుత్పత్తికి బొగ్గు లేకుండా పోయింది. దీంతో పోలీసులు శనివారం ఆర్ధరాత్రి సుమారు 40 మంది సింగరేణి కార్మికులను అరెస్టు చేశారు. వారితో ఓపెన్ కాస్ట్ పనులు చేయించే ప్రయత్నాలు చేశారు.

అయితే కార్మికులను అరెస్టు చేసి బలవంతంగా వారితో పని చేయించడంపై తెలంగాణ జెఏసి ఆగ్రహం వ్యక్తం చేసింది. తెలంగాణవ్యాప్తంగా తీవ్ర ఉద్రిక్త పరిస్థితి ఏర్పడింది. దీంతో దిగొచ్చిన పోలీసులు 40 మంది కార్మికులను విడుదల చేశారు. కార్మికులు సైతం పని చేయడానికి నిరాకరించారట. అయినప్పటికీ వారితో బలవంతంగా పని చేయించాలని చూసినట్టు సమాచారం. కాగా సింగరేణి కార్మికుల అరెస్టును టిఆర్ఎస్ నేతలు కొప్పుల ఈశ్వర్ తదితరులు తీవ్రంగా ఖండించారు. సింగరేణి కార్మికుల కుటుంబాలను కూడా పోలీసులు వేధిస్తున్నారని ఆయన ఆరోపించారు.

Published On September 18, 2011