పాపం పండింది: ఆంధ్రజ్యోతి ఎండిపై అంబటి రాంబాబు

హైదరాబాద్: మొదట తనపై రాసలీలల కథనం ప్రసారం చేసి, ఆ తర్వాత తాను భూములు ఆక్రమించినట్లు వార్తాకథనాలు ప్రచురించిన ఆంధ్రజ్యోతి మేనేజింగ్ డైరెక్టర్ రాధాకృష్ణపై వైయస్సార్ కాంగ్రెసు పార్టీ నాయకుడు అంబటి రాంబాబు తీవ్రంగా ధ్వజమెత్తారు. రాధాకృష్ణ పాపం పండబోతోందని ఆయన ఆదివారం మీడియా ప్రతినిధుల సమావేశంలో అన్నారు. కొంత మందితో కుమ్మక్కయి వైయస్సార్ కాంగ్రెసు పార్టీలో క్రియాశీలక పాత్ర నిర్వహించే నాయకులను రాధాకృష్ణ అప్రతిష్టపాలు చేసేందుకు ప్రయత్నిస్తున్నారని, ఇదో పెద్ద కుంభకోణమని ఆయన అన్నారు.

రాధాకృష్ణపై అంబటి రాంబాబు తీవ్ర వ్యాఖ్యలు చేశారు. హైదరబాదులోని ఆబిడ్స్ స్ట్రింగర్‌గా 150 రూపాయల జీతంతో ప్రారంభించిన రాధాకృష్ణ కోట్ల రూపాయల విలువ చేసే మీడియా సంస్థకు ఎలా అధిపతి అయ్యాడని ఆయన ప్రశ్నించారు. రాధాకృష్ణ వృత్తి బ్రోకరిజమని, సంపాదనంతా బ్లాక్ మెయిల్‌ ద్వారా వచ్చిందేనని ఆయన ఆరోపించారు. తెలుగుదేశం పార్టీ అధ్యక్షుడు నారా చంద్రబాబు నాయుడు రాధాకృష్ణకు మినీ జల విద్యుత్ కేంద్రాన్ని ఎందుకు ఇచ్చారని ఆయన అడిగారు. స్వామీజీలను బెదిరించి కోట్లాది రూపాయలు రాధాకృష్ణ నొక్కేశాడని ఆయన ఆరోపించారు. వైయస్సార్ కాంగ్రెసు పార్టీ నాయకుడు గట్టు రామచంద్రరావు కూడా ఈ మీడియా సమావేశంలో పాల్గొన్నారు.

English summary

YSR Congress party leader Ambati Rambabu retaliated Andhrajyothy MD Radhakrishna.