గాలి నోరు మెదప లేదు, అక్రమాలు జరిగాయి: సిబిఐ

By Srinivas

Published: Monday, September 19, 2011, 15:36 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డి, ఓబుళాపురం మైనింగ్ కార్పోరేషన్ ఎండి శ్రీనివాస్ రెడ్డి తమ కస్టడీలో ఉన్నప్పుడు నోరు మెదపలేదని సోమవారం సిబిఐ అధికారులు చెప్పారు. వారి నుండి సమాధానాలు రాబట్టేందుకే కస్టడీ పెంపుకు కోర్టులో పిటిషన్ వేసినట్లు చెప్పారు. నిందితులు తమ కస్టడీలో ఉన్నప్పుడు సాక్ష్యులు వీడియో ఆధారాలతో సహా తమ ముందుకు వచ్చారన్నారు. వారికి బెయిల్ ఇచ్చి బయటకు పంపిస్తే సాక్ష్యులను బెదిరించి సాక్ష్యాలు తారుమారు చేసే అవకాశముందన్నారు. మైనింగులో ఖచ్చితంగా అక్రమాలు జరిగాయన్నారు.

నిందితుల నుండి బినామీ కంపెనీలు, ఖాతాల వివరాలు తెలుసుకోవాల్సి ఉందన్నారు. మరింత సమాచారం వారి నుండి సేకరించాల్సి ఉందన్నారు. కాగా సోమవారంతో గాలి, శ్రీనివాస్ రెడ్డిల సిబిఐ కస్టడీ ముగియడంతో అధికారులు కోర్టులో హాజరు పరిచారు. కోర్టు వారిని రెండు వారాల పాటు జ్యూడిషియల్ కస్టడీకి తరలించింది. కాగా వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తుల కేసు విషయంలో వాన్ పిక్, మ్యాట్రిక్స్ కంపెనీల ప్రతినిధులు సిబిఐ అధికారుల ఎదుట హాజరయ్యారు. జగతి పబ్లికేషన్స్ వైస్ చైర్మన్ విజయ సాయి రెడ్డి పదహారో రోజు హాజరయ్యారు. ఆయనతో పాటు జగతి తరఫున మరో ఇద్దరు ప్రతినిధులు హాజరయ్యారు.

Published On September 19, 2011