సమ్మెపై కెసిఆర్, కోదండరాంలకు హైకోర్టు నోటీసులు

By Srinivas

Published: Monday, September 19, 2011, 12:50 [IST]

హైదరాబాద్: సకల జనుల సమ్మెపై హైకోర్టు సోమవారం తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్ కోదండరామ్, ప్రభుత్వానికి నోటీసులు జారీ చేసింది. సకల జనుల సమ్మెపై ప్రజా ప్రయోజన వ్యాజ్యం కింద వెంకట నారాయణ అనే వ్యక్తి హైకోర్టులో పిటిషన్ దాఖలు చేశారు. సమ్మె వల్ల ప్రయివేటు, ప్రభుత్వ వ్యవస్థలు పూర్తిగా స్తంభించి పోయాయని ఆయన తన పిటిషన్‌లో పేర్కొన్నారు. దీంతో ప్రజలు ఇబ్బందులెదుర్కొంటున్నారన్నారు. ఆస్తులకు నష్టం జరుగుతోందన్నారు. సామాన్యులు ఇబ్బందులు ఎదుర్కొంటున్నారన్నారు. ఆయన పిటిషన్ స్వీకరించిన కోర్టు కెసిఆర్, కోదండరాం, ప్రభుత్వానికి నోటీసులు జారీ చేసింది.

సమ్మెను ఎందుకు అడ్డుకోరాదని ప్రభుత్వం, సమ్మె వల్ల లాభాలను కోదండరాం, కెసిఆర్ సవివరంగా కౌంటర్ దాఖలు చేసే అవకాశం ఉంది. కాగా నల్గొండ జిల్లా కొత్తగూడ రహదారుల దిగ్బందంలో పాల్గొన్న కోదండరాం తెలంగాణ వచ్చే వరకు ఉద్యమం కొనసాగుతుందన్నారు. తెలంగాణపై కేంద్రం ఖచ్చితమైన తేదిని, నిర్ణీత సమయాన్ని ప్రకటించాలని డిమాండ్ చేశారు. సింగరేణి కార్మికుల అరెస్టు అక్రమమన్నారు. కాగా ఈ నెల 13వ తారీఖు నుండి విడతల వారిగా సకల జనుల సమ్మె ఉధృతమవుతున్న విషయం తెలిసిందే.

Published On September 19, 2011