సమ్మె సెగ: తలొగ్గి లేచిపోయిన మంత్రి శ్రీధర్‌ బాబు

By Srinivas

Published: Thursday, September 22, 2011, 14:42 [IST]

హైదరాబాద్: సకల జనుల సమ్మె ప్రభావం సచివాలయంలో మంత్రుల విలేకరుల సమావేశంపై పడింది. గురువారం మధ్యాహ్నం మంత్రులు వట్టి వసంత్ కుమార్, రఘువీరా రెడ్డి, శ్రీధర్ బాబు సమావేశంలో తెలంగాణ ఉద్యోగులు, న్యాయవాదులు వారి ప్రెస్ మీట్ అడ్డుకున్నారు. జై తెలంగాణ అంటూ నినాదాలు చేశారు. తెలంగాణ కోసం ఉద్యోగులతో సహా అందరూ విధులు బహిష్కరిస్తుంటే మీరు విధులలో ఎలా హాజరవుతున్నారని ప్రశ్నించారు. ప్రెస్ మీట్ నుండి బయటకు రావాలని వారు ఆయనను డిమాండ్ చేశారు. దాంతో మంత్రి రఘువీరా వారిని సముదాయించే ప్రయత్నాలు చేశారు. ఆయన వ్యాఖ్యలను వారు తిప్పి కొట్టారు. తెలంగాణ కోసం ఇంత భారీస్థాయిలో ఉద్యమం జరుగుతుంటే పదవులు పట్టుకొని ఎలా వేలాడుతున్నారని విమర్శించారు. శ్రీధర్ బాబుకు వ్యతిరేకంగా నినాదాలు చేశారు. అయితే వారి డిమాండుకు శ్రీధర్ బాబు తలొగ్గక తప్పలేదు. ప్రెస్ మీట్ నుండి బయటకు వెళ్లిపోయారు.

అంతకుముందు ప్రెస్ మీట్ ప్రారంభ సమయంలో వారు అడ్డుకున్న సమయంలో శ్రీధర్ బాబు మాట్లాడుతూ తెలంగాణ రావాలనే ఆకాంక్ష తమకూ ఉందన్నారు. రాజకీయ ప్రక్రియ ద్వారానే తెలంగాణ సాధ్యమవుతుందన్నారు. ప్రక్రియ కొనసాగుతోందనన్నారు. కేంద్రం చర్చలు జరుపుతోందన్నారు. తెలంగాణపై రాజీ సమస్యే లదేన్నారు. మా కమిట్ మెంటును ఎవరూ శంకించవద్దన్నారు. ప్రభుత్వానికి రెండు నెలలు గడువిచ్చామన్నారు. కాగా హైకోర్టు ఎదుట తెలంగాణ న్యాయవాదులు ఆందోళన చేపట్టడంతో భారీగా ట్రాపిక్ జాం అయింది.

Published On September 22, 2011