ఎసిబి విచారణ, ఎస్సై కుమారుడి ఆత్మహత్య

తిరుపతి: యాంటీ కరప్షన్ బ్యూరో(ఎసిబి) అధికారులు ఓ యువకుడిని బలితీసుకున్నట్లుగా ఆరోపణలు వస్తున్నాయి. మృతుడి తండ్రి ఎసిబియే తన తనయుడి ప్రాణాలు బలి తీసుకున్నదని ఆరోపిస్తున్నారు. కడపకు చెందిన ఎస్సై రామచంద్రయ్యపై ఈ నెల 13వ తారీఖున ఎసిబి అధికారులు దాడులు చేశారు. ఒకరి దగ్గరి నుండి వెయ్యి రూపాయలు తీసుకుంటుండగా ఎసిబి వారికి రామచంద్రయ్య పట్టుబడ్డారు. దీంతో వారు రామచంద్రయ్యను విచారించారు. రామచంద్రయ్య పద్దెనిమిదేళ్ల తనయుడు రాజీవ్‌ను సైతం పిలిపించి విచారణ జరిపారు.

అయితే ఎసిబి అధికారులు తనను అనవసరంగా విచారిస్తున్నారని, తన తండ్రిని లంచావతారం అని అంటున్నారని మనస్థాపం చెందిన రాజీవ్ పురుగుల మందు తాగి ఆత్మహత్యాయత్నం చేశాడు. వెంటనే రాజీవ్‌ను స్థానిక ప్రైవేట్ వైద్యశాలలో చేర్పించి చికిత్స చేయించారు. పరిస్థితి విషమంగా ఉందని వైద్యులు రాజీవ్‌ను శ్రీ వెంకటేశ్వర మెడికల్ ఇన్ట్సిట్యూట్(స్విమ్స్)కు తరలించారు. చికిత్స పొందుతున్న రాజీవ్ మంగళవారం మృతి చెందారు. తన తనయుడిని ఎసిబి అధికారులు మానసికంగా హింసించడం వల్లనే మృతి చెందాడని తండ్రి రామచంద్రయ్య ఆరోపిస్తున్నాడు.

English summary

SI alleged that his son committed suicide due to ACB enquiry at Tirupati.