మంత్రులకు చేదు అనుభవం, రాజీనామాకు డిమాండ్

By Srinivas

Published: Thursday, September 29, 2011, 15:21 [IST]

హైదరాబాద్: తెలంగాణలో మంత్రులకు చేదు అనుభవం ఎదురవుతోంది. గురువారం మంత్రి దానం నాగేందర్, కోమటిరెడ్డి వెంకట రెడ్డిలకు రాజీనామా సెగ తగిలింది. తెలంగాణ అడ్వోకేట్ల ఐక్య కార్యాచరణ సమితి ఉదయం కార్మిక శాఖ మంత్రి దానం నాగేందర్ ఇంటిని ముట్టడించారు. వెంటనే రాజీనామా చేయాలని డిమాండ్ చేశారు. ఆయన ఇంటిముందు చావు డప్పు వాయించారు. దీంతో దానం ఇంటి వద్ద ఉద్రిక్త పరిస్థితి ఏర్పడింది. పోలీసులు పలువురిని అరెస్టు చేశారు. ఈ సందర్భంగా దానం మాట్లాడారు. తెలంగాణ కోసం రాజీనామాలు చేయాల్సిన అవసరం లేదన్నారు. కాంగ్రెసు పార్టీ అధిష్టానం తెలంగాణకు అనుకూలంగానే ఉందని చెప్పారు.

తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు పొద్దున ఓ మాట సాయంత్రం ఓ మాట చెబుతున్నారని విమర్శించారు. అడ్వోకేట్ల సలహాలు, సూచనలు తమకు అవసరం లేదన్నారు. సమ్మె వల్ల విద్యార్థుల భవిష్యత్తు నాశనం అవుతోందన్నారు. నల్గొండ జిల్లా చండూరులో మంత్రి కోమటిరెడ్డి వెంకట రెడ్డికి సైతం చేదు అనుభవం ఎదురయింది. మంత్రి కాన్వాయ్‌ని తెలంగాణవాదులు అడ్డుకున్నారు. తెలంగాణ కోసం వెంటనే రాజీనామా చేయాలని డిమాండ్ చేశారు. పరిస్థితి ఉద్రిక్తంగా మారటంతో పోలీసులు లాఠీఛార్జ్ చేసి చెదరగొట్టారు. అయితే తమపై మంత్రి అనుచరులు సైతం దాడి చేశారని వారిపై చర్యలు తీసుకోవాలని ఆందోళనకారులు ధర్నాకు దిగారు. ఇద్దరు యువకులు వాటర్ ట్యాంక్ ఎక్కి మంత్రి అనుచరులపై చర్యలు తీసుకోవాలని డిమాండ్ చేశారు.

Published On September 29, 2011