ఆజాద్ నివేదిక తర్వాత తెలంగాణపై సమయం: చిదంబరం

By Pratap

Published: Friday, September 30, 2011, 15:51 [IST]

న్యూఢిల్లీ: తెలంగాణపై కాంగ్రెసు ఆంధ్రప్రదేశ్ రాష్ట్ర వ్యవహారాల ఇంచార్జీ గులాం నబీ ఆజాద్ సమర్పించిన తర్వాత కూడా పార్టీ, ప్రభుత్వం నిర్ణయం తీసుకోవడానికి కొంత సమయం పడుతుందని కేంద్ర హోం మంత్రి పి. చిదంబరం అన్నారు. ఆజాద్ రాష్ట్రానికి చెందిన పార్టీ ప్రజాప్రతినిధులతో చర్చలు జరిపారని, నేడో రేపో ఆజాద్ నివేదికను సమర్పిస్తారని, ఆజాద్ నివేదిక సమర్పించిన తర్వాత నిర్ణయం తీసుకోవడానికి సమయం పడుతుందని ఆయన శుక్రవారం మీడియా ప్రతినిధుల సమావేశంలో అన్నారు. రాష్ట్రానికి చెందిన నాలుగు పార్టీలు తెలంగాణపై నిర్ణయం వెల్లడించాల్సి ఉందని ఆయన అన్నారు.

తెలుగుదేశం, మజ్లీస్ పార్టీలు కాంగ్రెసు నిర్ణయం కోసం ఎదురు చూస్తున్నాయని, వైయస్సార్ కాంగ్రెసు పార్టీ తెలంగాణపై స్పందించనే లేదని ఆయన అన్నారు. ఆ పార్టీల నిర్ణయం కూడా కాంగ్రెసు నిర్ణయంపై ఆధారపడి ఉంటాయని ఆయన అన్నారు. కాంగ్రెసు నిర్ణయం తీసుకున్న తర్వాత అఖిల పక్ష సమావేశాన్ని ఏర్పాటు చేసే అవకాశం ఉందని ఆయన చెప్పారు. సమస్య తీవ్రతను కేంద్ర ప్రభుత్వం గుర్తించిందని, అందువల్ల సమ్మెను కొనసాగించడం సరి కాదని ఆయన అన్నారు. సమ్మెను, రాస్తారోకోలను, రైల్ రోకోలను విరమించాలని ఆయన విజ్ఞప్తి చేశారు. ఆందోళనల వల్ల అభివృద్ధి కుంటు పడుతుందని, ఆర్థికాభివృద్ధి కూడా కుంటుపడుతుందని ఆయన అన్నారు.

Published On September 30, 2011