కోర్టులో భంగపాటు, జైలులోనే గాలి జనార్దన్ రెడ్డి

By Pratap

Published: Friday, September 30, 2011, 17:24 [IST]

న్యూఢిల్లీ/ హైదరాబాద్: కర్ణాటక మాజీ మంత్రి గాలి జనార్దన్ రెడ్డికి, ఒఎంసి మేనేజింగ్ డైరెక్టర్ శ్రీనివాస రెడ్డికి హైదరాబాదులోని నాంపల్లి కోర్టులో చుక్కెదురైంది. వారి బెయిల్ పిటిషన్లను కోర్టు శుక్రవారం తిరస్కరించింది. దీంతో యథావిధిగా జ్యుడిషియల్ కస్టడీ కొనసాగుతుంది. వారిద్దరు జైలులోనే ఉండాల్సి వస్తుంది. కాగా, సిబిఐ దాఖలు చేసిన కస్టడీ పిటిషన్‌ను కూడా కోర్టు డిస్మిస్ చేసింది. గాలి జనార్దన్ రెడ్డిని, శ్రీనివాస రెడ్డిని మరో 9 రోజుల పాటు తమ కస్టడీకి అప్పగించాలని సిబిఐ పిటిషన్ దాఖలు చేసింది. అయితే, వారిద్దరిని తమ కస్టడీకి అప్పగించాలని కోరుతూ సిబిఐ హైకోర్టుకు వెళ్లే అవకాశం ఉంది.

గాలి జనార్ధన్‌రెడ్డి అక్రమ మైనింగ్ గనుల కేసుకు సంబంధించి సీబీఐ శుక్రవారం సుప్రీంకోర్టుకు మధ్యంత నివేదికను సమర్పించింది. సీబీఐ జాయింట్ డైరెక్టర్ లక్ష్మీనారాయణ ఈ మేరకు 65 పేజీల నివేదికను కోర్టుకు సమర్పించారు. అలాగే కేసు దర్యాప్తునకు మరింత దర్యప్తుకు సమయం కావాలని సుప్రీంకోర్టును కోరారు. ఇదిలా ఉంటే, వైపెస్పార్ కాంగ్రెస్ పార్టీ అధ్యక్షుడు జగన్మోహన్‌రెడ్డి అక్రమాస్తులపై విచారణ ముమ్మరంగా సాగుతోంది. శుక్రవారం కూడా జగతి పబ్లికేషన్స్ వైస్ ప్రెసిడెంట్ విజయసాయిరెడ్డి సీబీఐ ముందు హాజరయ్యారు.

Published On September 30, 2011