బతికే కంటి చనిపోవడం మేలు: మంత్రులపై జూపల్లి

By Srinivas

Published: Monday, October 3, 2011, 15:42 [IST]

హైదరాబాద్: మంత్రులు ఆత్మవంచనకు పాల్పడి బ్రతకడం కంటే చనిపోవడం మేలను మాజీ మంత్రి జూపల్లి కృష్ణారావు సోమవారం తెలంగాణ ప్రాంత మంత్రులపై తీవ్రస్థాయిలో విరుచుకు పడ్డారు. తెలంగాణ మంత్రులు ప్రత్యేక రాష్ట్రం కోసం చిత్తశుద్ధితో లేరని ఆరోపించారు. అలా ఉండటం ఆత్మవంచనే అన్నారు. ఆత్మవంచనతో బతికే కంటే మరణించడం మేలన్నారు. పదవుల కోసం ఉంటే తెలంగాణ కోసం చనిపోయిన వారి ఉసురు తగులుతుందని హెచ్చరించారు. మంత్రులపై ఇప్పటికే తెలంగాణ ద్రోహులని ముద్ర పడిందన్నారు.

ద్రోహులను ముద్రపడ్డ తర్వాత వారికి ఒక్క నిమిషం కూడా పదవులలో కొనసాగే అర్హత లేదన్నారు. వెంటనే రాజీనామా చేయాలని డిమాండ్ చేశారు. ముఖ్యమంత్రి కిరణ్ కుమార్ రెడ్డి మొసలి కన్నీరు కారుస్తూ తెలంగాణకు అడ్డుపడుతున్నారని విమర్శించారు. ముఖ్యమంత్రి, సీమాంధ్ర ప్రజా ప్రతినిధులు తెలంగాణ అంశంపై అధిష్టానం చెప్పినట్లు వినాలని, ఇప్పటి వరకు తాము చేసింది తప్పు అని ఒప్పుకుంటే సకల జనుల సమ్మె విరమించడానికి తాము సిద్ధంగా ఉన్నామని చెప్పారు.

Published On October 3, 2011