టిఆర్ఎస్‌తో కలవకుంటే తెలంగాణ వచ్చేది: శంకర రావు

By Srinivas

Published: Monday, October 3, 2011, 17:01 [IST]

హైదరాబాద్: 2004 ఎన్నికల్లో తెలంగాణ రాష్ట్ర సమితి కాంగ్రెసు పార్టీతో కలవక పోయి ఉంటే అప్పుడే తెలంగాణ వచ్చేదని చేనేత, జౌళీ శాఖ మంత్రి శంకర రావు సోమవారం సంచలన వ్యాఖ్యలు చేశారు. కాంగ్రెసు పార్టీ తెలంగాణ ఇస్తుందన్న నమ్మకం తనకు ఉందన్నారు. ఏఐసిసి అధ్యక్షురాలు సోనియా గాంధీ త్వరలో తెలంగాణకు పరిష్కారం చూపుతుందని ఆయన అభిప్రాయపడ్డారు. ముఖ్యమంత్రి కిరణ్ కుమార్ రెడ్డి మంత్రివర్గంలో పలువురు మంత్రులపై ఆరోపణలు వచ్చాయని వారంతా నైతికతతో వ్యవహరించి రాజీనామాలు చేయాలని సూచించారు.

సకల జనుల సమ్మె కారణంగా రాష్ట్రంలో తీవ్ర విద్యుత్ కొరత ఏర్పడుతోందన్నారు. పంట వేసిన రైతులకు విద్యుత్ అందకుంటే తీవ్రంగా నష్టపోవాల్సి ఉంటుందన్నారు. ప్రభుత్వమే వారిని ఆదుకోవాలన్నారు. రైతులకు విద్యుత్ అందించడానికి ప్రత్యామ్నాయ మార్గాలు చూడాలన్నారు. ఎంత ధరైనా చెల్లించి విద్యుత్ కొని అందించాలన్నారు. జల విద్యుత్ వెంటనే ప్రారంభించాలని డిమాండ్ చేశారు. విద్యుత్ కొరతకు సమ్మెను సాకుగా చూపే ప్రయత్నాలు చేయవద్దన్నారు.

Published On October 3, 2011