దసరా వేళ మందుబాబులకు దెబ్బ, నో స్టాక్ బోర్డులు

By Srinivas

Published: Wednesday, October 5, 2011, 14:33 [IST]

హైదరాబాద్: తెలంగాణలోని సకల జనుల సమ్మె ప్రభావం వైన్ దుకాణాల పైనా పడింది. ప్రత్యేక తెలంగాణ రాష్ట్రం కోసం చేస్తున్న ఉద్యమంలో భాగంగా ఎక్సైజ్ శాఖ అధికారులు సమ్మెలో పాల్గొంటున్నారు. సమ్మెకు తోడుగా దసరా పండుగ రావడంతో వైన్ దుకాణాల పైన సమ్మె ప్రభావం పడింది. అసలే పండుగ రావడంతో ఎక్కడ మందు దొరకదో అనే భావనతో మందు బాబులు దుకాణాల ముందు వరుస కట్టారు. హైదరాబాదు కేంద్రంలోనే కాకుండా పరిసర ప్రాంతాలలోనూ మందుబాబులు వైన్ షాపుల ముందు క్యూ కట్టారు. అయితే ఇదే అదునుగా భావించిన వైన్ దుకాణాల యజమానులు కూడా ఎక్కువ ధరలకు అమ్ముతున్నారు. ఒక్కో దానికి సుమారు రూ.50 ఆ పైగా ఎక్కువ డబ్బులు వసూలు చేస్తున్నారు. యజమానులు లిక్కర్ కృత్రిమ కొరత సృష్టించేందుకు ప్రయత్నాలు చేస్తున్నారు. ఇప్పటికే పలు దుకాణాల ముందు నో స్టాక్ బోర్డులు పెట్టారు.

గురువారం దసరా పండుగ కావడంతో ప్రస్తుతానికి కృత్రిమ కొరత సృష్టించి ఆ తర్వాత మరింత ఎక్కువ ధరలకు అమ్ముకోవాలని చూసుకోవాలని భావిస్తున్నట్లుగా తెలుస్తోంది. మద్యం స్టాక్ మరింత కావాలని దుకాణ యజమానులు అంబర్ పేటలోని లిక్కర్ డిపో వద్ద మధ్యాహ్నం ఆందోళనకు దిగడం విశేషం. మరోవైపు ఎక్సైజ్ శాఖ మంత్రి మోపిదేవి వెంకట రమణ తిరుపతిలో మాట్లాడుతూ ఎక్సైజ్ శాఖ ఉద్యోగులు సమ్మెకు దిగడం నిబందనలకు విరుద్దమన్నారు. సమ్మెకు దిగకుండా ఉద్యోగులతో చర్చలు జరుపుతున్నామని సాయంత్రం వరకు చర్చలు పూర్తి కావచ్చునన్నారు. పరిస్థితి చేయి దాటినా ప్రత్యామ్నాయాలు చూస్తామని మోపిదేవి చెప్పారు.

Published On October 5, 2011