జగన్ కోసం జైలులో బిర్యానీ తయారవుతోంది: డిఎల్

By Pratap

Published: Thursday, October 6, 2011, 14:21 [IST]

కడప/ కర్నూలు: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి కోసం జైలులో బిర్యానీ తయారవుతోందని రాష్ట్ర మంత్రి డిఎల్ రవీంద్రా రెడ్డి వ్యాఖ్యానించారు. జగన్ అవినీతి కేసులపై త్వరలో చర్యలుంటాయని ఆయన గురువారం మీడియా ప్రతినిధులతో అన్నారు. వైయస్ జగన్‌ కాంగ్రెసుతో రాజీ పడే ప్రసక్తి లేదని, తమ కాంగ్రెసులో వస్తామంటే జగన్‌ను రానిచ్చేది లేదని ఆయన అన్నారు. వైయస్ జగన్, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కుమ్మక్కయి నాటకాలాడుతున్నారని ఆయన విమర్శించారు. తెలంగాణపై తమ పార్టీ అధిష్టానం రెండు నెలల్లో నిర్ణయం తీసుకుంటుందని ఆయన కడపలో అన్నారు.

తెలంగాణపై రాయలసీమకు చెందిన రాష్ట్ర మంత్రి ఏరాసు ప్రతాపరెడ్డి కర్నూలు జిల్లా శ్రీశైలం స్పందించారు. తెలంగాణ ఇవ్వడం సులభం కాదని ఆయన అన్నారు. సకల జనుల సమ్మె సందర్భంగా ఆస్తులను, బస్సులను ధ్వంసం చేయడం తగదని ఆయన అన్నారు. తెలంగాణ సమస్యకు చర్చల ద్వారానే పరిష్కారం లభిస్తుందని ఆయన అభిప్రాయపడ్డారు. తెలంగాణపై నిర్ణయం తీసుకోవడానికి ముందు కాంగ్రెసు అధిష్టానం రాయలసీమవారితో కూడా మాట్లాడాలని ఆయన కోరారు.

Published On October 6, 2011