తెలంగాణపై ఉత్కంఠ: ఢిల్లీ బాట పట్టిన రాష్ట్ర నేతలు

By Pratap

Published: Saturday, October 8, 2011, 9:14 [IST]

న్యూఢిల్లీ: తెలంగాణపై కాంగ్రెసు అధిష్టానం ఏదో ఒక నిర్ణయం ప్రకటించబోతోందనే ప్రచారం ముమ్మరంగా సాగుతోంది. దీంతో సర్వత్రా ఉత్కంఠ నెలకొంది. పార్టీ అధిష్టానం పిలుపు మేరకు రాష్ట్రానికి చెందిన ముఖ్య నాయకులు ఢిల్లీ బాట పట్టారు. గవర్నర్ నరసింహన్ ఇప్పటికే ఢిల్లీ చేరారు. ముఖ్యమంత్రి కిరణ్ కుమార్ రెడ్డి, ఉప ముఖ్యమంత్రి దామోదరం రాజనర్సింహలు శనివారం ఉదయం ఢిల్లీకి చేరుకున్నారు. పిసిసి అధ్యక్షుడు బొత్స సత్యనారాయణతో పాటు పిసిసి మాజీ అధ్యక్షుడు డి. శ్రీనివాస్ కూడా ఢిల్లీకి చేరుకున్నారు. ఆ నలుగురితో తెలంగాణపై చర్చల కోసమే వారిని అధిష్టానం ఢిల్లీకి పిలిపించింది.

శుక్రవారం రాత్రి కాంగ్రెసు మినీ కోర్ కమిటీ ఏ నిర్ణయం తీసుకోకుండానే ముగిసింది. ఎనిమిది అంశాలతో గవర్నర్ రాష్ట్ర పరిస్థితులపై నివేదిక రూపొందించుకున్నట్లు తెలుస్తోంది. కేంద్ర హోం మంత్రి చిదంబరంతో, ప్రధాని మన్మోహన్ సింగ్‌తో గవర్నర్ సమావేశమైన తర్వాత రాష్ట్ర నాయకులతో అధిష్టానం పెద్దలు సమావేశమయ్యే అవకాశం ఉంది. సాయంత్రం మరోసారి కాంగ్రెసు ఉన్నత స్థాయి సమావేశం జరుగుతుంది. సకల జనుల సమ్మె విరమించాలని కోరుతూ ప్రధాని గానీ కేంద్ర హోం మంత్రి గానీ ఓ ప్రకటన చేసే అవకాశం ఉన్నట్లు తెలుస్తోంది. ఆ ప్రకటన తెలంగాణపై సానుకూల వైఖరిని వ్యక్తం చేస్తూ వెలువడే అవకాశం ఉన్నట్లు తెలుస్తోంది.

Published On October 8, 2011