సిఎం ఎన్ని వెర్రి వేషాలు వేసినా ఆగదు: కెసిఆర్

హైదరాబాద్: ముఖ్యమంత్రి కిరణ్ కుమార్ రెడ్డిపై తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు మంగళవారం తీవ్రస్థాయిలో ధ్వజమెత్తారు. కిరణ్ ఎన్ని వెర్రి వేషాలు వేసినా ఉద్యమం ఆగదన్నారు. తెలంగాణ రాజకీయ ఐక్య కార్యాచరణ సమితి పిలుపు మేరకు కోటి మంది తెలంగాణ ప్రజలు రైలు పట్టాల పైకి వస్తారని వారినందరినీ అడ్డుకునే సత్తా కిరణ్‌కు ఉందా అని ప్రశ్నించారు. తెలంగాణ ఉద్యమంలో పాల్గొంటున్న నేతలపై ఎన్ని కేసులు పెట్టినా ఉద్యమం ఆగదన్నారు. నో వర్క్ నో పే అంటే ముఖ్యమంత్రికి కూడా జీతం రావద్దన్నారు.

వంద శాతం తెలంగాణ వచ్చి తీరుతుందన్నారు. ఉద్యోగుల జీతాలు ఎక్కడకు పోవని తెలంగాణ వచ్చాక వడ్డీతో సహా చెల్లిస్తామన్నారు. కాంట్రాక్టు ఉద్యోగులను పర్మినెంట్ చేసి ప్రమోషన్లు ఇస్తామన్నారు. తప్పుడు కేసులు ఎన్ని పెట్టినా ఉద్యమం శాంతియుతంగా కొనసాగుతుందన్నారు. ఢిల్లీ పెద్దలు తెలంగాణ సమస్యను పరిష్కరించకుండా ఏం చేస్తున్నారన్నారు. కాలాయాపన సరికాదన్నారు. హైదరాబాదును కేంద్రపాలిత ప్రాంతంగా చేసి ఢిల్లీ చేతులో పెడతారా అని ప్రశ్నించారు. ఆంధ్రా నేతలంతా కలిసి సమ్మె విరమించినట్లు ప్రకటించారని తెలంగాణలో బస్సులు ఎక్కడా తిరగడం లేదన్నారు. 1956 నాటి ముందు తెలంగాణే కావాలన్నారు.

English summary

TRS chief K Chandrasekhar Rao warned CM Kiran Kumar Reddy for cases against Telanganites. He called people to participate in rail roko.