తిరగబడతారు: కెసిఆర్‌పై సీమాంధ్ర నేతల ఫైర్

హైదరాబాద్/విజయవాడ: టిఆర్ఎస్ అధ్యక్షుడు కల్వకుంట్ల చంద్రశేఖర రావుపై సీమాంధ్ర ప్రజా ప్రతినిధులు మంగళవారం తీవ్రస్థాయిలో విరుచుకు పడ్డారు. చిన్న నీటి పారుదల శాఖ మంత్రి టిజి వెంకటేష్ తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, సిరిసిల్ల శాసనసభ్యుడు కె తారక రామారావు తదితర తెరాస నేతల కంటే ఇష్టం వచ్చినట్లుగా ఏమీ మాట్లాడ లేదని మంత్రి శైలజానాథ్ మంగళవారం అన్నారు. బ్లాక్ మెయిల్ రాజకీయాలతో ప్రత్యేక రాష్ట్రాలు ఏర్పడవన్నారు. సీమాంధ్ర ప్రజా ప్రతినిధులకు ప్రస్తుతం ఢిల్లీ వెళ్లే ఆలోచన లేదన్నారు. తెలంగాణపై అధిష్టానం నిర్ణయం తీసుకున్న తర్వాత ఢిల్లీ పర్యటనపై నిర్ణయించుకుంటామన్నారు. లేకుంటే అధిష్టానం నుండి తమకు పిలుపు వచ్చాక ఆలోచిస్తామన్నారు. గతంలో జై ఆంధ్ర ఉద్యమం వచ్చినప్పుడు తెలంగాణ నేతలే విశాలాంధ్ర ఉండాలన్నారని గుర్తు చేశారు. కెసిఆర్, కెటిఆర్ వ్యాఖ్యలను తాము పట్టించుకోమన్నారు. రెచ్చగొట్టేలా ఎవరు మాట్లాడినా తప్పేనన్నారు.

ముఖ్యమంత్రి కిరణ్ కుమార్ రెడ్డిని విమర్శించే స్థాయి కెటిఆర్‌కు లేదని ఎమ్మెల్యే జోగి రమేష్ విజయవాడలో అన్నారు. సమ్మె కారణంగా ప్రజలు ప్రయివేటు వాహనాల్లో ప్రయాణించి ప్రాణాలు కోల్పోతున్నారని ఆవేదన వ్యక్తం చేశారు. తెలంగాణ మంత్రుల కుయుక్తులకు అధిష్టానం లొంగవద్దని కోరారు. కెసిఆర్‌పై విద్యార్థులు, తల్లిదండ్రులు త్వరలో తిరగబడతారన్నారు. కెసిఆర్ తన మనవళ్లను కార్పోరేట్ పాఠశాలల్లో చదివిస్తూ సామాన్య ప్రజల బిడ్డల చదువుకు అడ్డుకుంటున్నారని మరో ఎమ్మెల్యే మల్లాది విష్ణు ఆరోపించారు.

English summary

Seemandhra leaders Sailajanath, Malladi Visnu and Jogi Ramesh fired at TRS chief K Chandrasekhar Rao today.