ఎమ్మెల్సీ రేసులో గిరీష్ సంఘీ, రోశయ్య ఆశీస్సులు

By Pratap

Published: Wednesday, October 12, 2011, 14:46 [IST]

హైదరాబాద్: వార్త దినపత్రిక యజమాని గిరీష్ సింఘీ ఎమ్మెల్సీ సీటు కోసం జోరుగా ప్రయత్నాలు సాగిస్తున్నారు. గతంలో ఆయన రాజ్యసభ సభ్యుడిగా పనిచేశారు. కె. రోశయ్య తమిళనాడు గవర్నర్‌గా వెళ్లడంతో ఓ ఎమ్మెల్సీ స్థానం ఖాళీ అయింది. దానికోసం కాంగ్రెసు నుంచి ఏడుగురు పోటీ పడుతున్నారు. వారిలో గిరీష్ ఒకరు. రోశయ్య ఆశీస్సులతో గిరీష్ సంఘీ ఆ సీటు కోసం ప్రయత్నిస్తున్నట్లు సమాచారం. ఈ నెల 17వ తేదీ నుంచి ఎమ్మెల్సీ ఎన్నికకు నామినేషన్ల ఘట్టం ప్రారంభమవుతుంది. కాంగ్రెసులో ప్రధాన నాయకుడిగా ముందుకు వచ్చిన చిరంజీవి తనతో పాటు కాంగ్రెసులోకి వచ్చిన కోటగిరి విద్యాధర రావుకు ఆ సీటు ఇప్పించడానికి ప్రయత్నాలు సాగిస్తున్నట్లు సమాచారం. తమకు ఇచ్చిన హామీ మేరకు ఓ ఎమ్మెల్సీ సీటు ఇవ్వాలని చిరంజీవి పార్టీ అధిష్టానాన్ని కోరుతున్నట్లు తెలుస్తోంది.

కాగా, కంతేటి సత్యనారాయణ రాజు, మాజీ మంత్రి షబ్బీర్ అలీ, గంగాధరం కూడా ఎమ్మెల్సీ సీటు కోసం ప్రయత్నిస్తున్నారు. గంగాధరంకు పిసిసి అధ్యక్షుడు బొత్స సత్యనారాయణ సహకారం అందిస్తున్నట్లు తెలుస్తోంది. ముఖ్యమంత్రి కిరణ్ కుమార్ రెడ్డి ఆలోచన మాత్రం మరో రకంగా ఉంది. ఆంధ్ర నేతకు ఆ సీటు కేటాయించదలుచుకుంటే భమిడిపాటి రామమూర్తికి, తెలంగాణ నేతకు కేటాయించే దలిస్తే తన క్లాస్ మేట్ రసూల్ ఖాన్‌కు ఆ సీటు ఇప్పించాలని ఆయన ప్రయత్నిస్తున్నట్లు తెలుస్తోంది. అయితే, ఆ సీటు రోశయ్య రాజీనామా చేయడం వల్ల ఖాళీ అయింది. అందువల్ల రోశయ్య మాటకే అధిష్టానం విలువ ఇచ్చే అవకాశం ఉందని అంటున్నారు. గిరీష్ సంఘీ తన సామాజిక వర్గానికి చెందినవారు కావడంతో రోశయ్య ఆ వైపు మొగ్గు చూపుతున్నట్లు తెలుస్తోంది.

Published On October 12, 2011