తెలంగాణ ఎంపీల ప్రత్యక్ష యుద్ధం: రైలు రోకోలో నేతలు

By Srinivas

Published: Wednesday, October 12, 2011, 14:03 [IST]

న్యూఢిల్లీ: ప్రత్యేక తెలంగాణ రాష్ట్ర సాధన కోసం తెలంగాణ ప్రాంత కాంగ్రెసు పార్లమెంటు సభ్యులు ప్రత్యక్ష కార్యాచరణకు సిద్ధమయ్యారు. ఇన్ని రోజులు అధిష్టానంతో సంప్రదింపుల ద్వారా పోరు సాగించిన ఎంపీలు ఇక నుండి తెలంగాణ రాజకీయ ఐక్య కార్యాచరణ సమితితో కలిసి పని చేసే అవకాశాలు కనిపిస్తున్నాయి. జెఏసి పిలుపు మేరకు ఈ నెల 15, 16, 17 తేదీల్లో జరిగే రైలు రోకోలో తాము పాల్గొంటున్నట్లు ఎంపీలు బుధవారం న్యూఢిల్లీలో ప్రకటించారు. ఆయా జిల్లాలకు చెందిన ఎంపీలు రైలు రోకో కార్యక్రమంలో పాల్గొంటారు.

నిజామాబాద్‌లో మధుయాష్కీ, గద్వాల్‌లో మందా జగన్నాథం, జమ్మికుంటలో పొన్నం ప్రభాకర్, వరంగల్‌లో రాజయ్య, నల్గొండలో గుత్తా సుఖేందర్ రెడ్డి, మహబూబాబాద్‌లో బలరాం నాయక్, భువనగిరిలో కోమటిరెడ్డి రాజగోపాల్ రెడ్డిలు పాల్గొంటారు. మరోవైపు శుక్రవారం నుండి పలువురు ఎంపీలు, ఎమ్మెల్యేలు ఆమరణ నిరాహార దీక్ష చేపట్టాలని నిశ్చయించుకున్నట్లు సమాచారం. హైదరాబాదులో అనుకూలమైన వేదిక కోసం ఎంపీలు వెదుకుతున్నట్లుగా తెలుస్తోంది. సుమారు పన్నెండు మంది ప్రజాప్రతినిధులు దీక్షలో పాల్గొనే అవకాశముందని తెలుస్తోంది.

Published On October 12, 2011