పార్టీ కోసం రంగంలోకి దిగిన వైయస్ జగన్

By Srinivas

Published: Wednesday, October 12, 2011, 12:23 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి పార్టీ స్థాపించిన తర్వాత మొదటిసారి జిల్లాల సమీక్షలు బుధవారం ప్రారంభించారు. ఉదయం రంగారెడ్డి జిల్లా నేతలతో సమీక్ష ప్రారంభించారు. అనంతరం మెదక్, నల్గొండ, హైదరాబాద్ జిల్లాల నేతలతో సమీక్షలు జరపనున్నారు. మధ్యాహ్నం ప్రయివేటు కార్యక్రమం ఉండటంతో సమీక్షలు అక్కడితో ఆపేస్తారు. ఆయా జిల్లాల కో-ఆర్డినేటర్లు, కన్వీనర్‌లు తదితరులతో వరుసగా నాలుగు రోజులు సమావేశమై సమీక్షిస్తారు. 13వ తేదిన ఆరు, 14న ఏడు, 15న మరో ఆరు జిల్లాల సమీక్ష జరపనున్నారని తెలుస్తోంది.

సమీక్షలలో ప్రధానం సభ్యత్వ నమోదు, కమిటీ నియామకాలపై దృష్టి సారించనున్నారు. స్థానికంగా ఉండే ప్రజా సమస్యలపై ఎప్పటికప్పుడు ఉద్యమించాలని జిల్లా నాయకులకు సూచించనున్నారు. తెలుగుదేశం, కాంగ్రెసు పార్టీ మ్యాచ్ ఫిక్సింగ్ అంశాన్ని ప్రజల్లోకి తీసుకు వెళ్లాలని ఆయన సూచించనున్నారు. తెలంగాణ ప్రాంతంలో సభ్యత్వ నమోదు తక్కువగా ఉండటంపై ఆయన ప్రత్యేకంగా దృష్టి సారించారట. జిల్లా సమీక్షల తర్వాత ఆయన గుంటూరు జిల్లాలో ఓదార్పు యాత్ర ప్రారంభిస్తారు.

Published On October 12, 2011