ఉమ్మెస్తే మన మీదే: కెసిఆర్‌పై తులసి రెడ్డి ధ్వజం

By Srinivas

Published: Tuesday, October 18, 2011, 16:30 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ తెలంగాణ కాంగ్రెసు నేతలే లక్ష్యంగా ఉద్యమాన్ని చేపడరనే వార్తల నేపథ్యంలో సీమాంధ్ర కాంగ్రెసు నేతలు వారిపై తీవ్రస్థాయిలో మండిపడ్డారు. తెరాస ఓ తోక పార్టీ అని గత ఎన్నికల్లో తెదేపా, వామపక్షాలతో కలిసి పోటీ చేసినప్పటికీ పది అసెంబ్లీ, రెండు పార్లమెంటు సీట్లను మాత్రమే గెలుచుకుందని తులసీ రెడ్డి విమర్శించారు. హైదరాబాదుతో సహా తెలంగాణలోని ఐదు జిల్లాల్లో ఒక్క ఎమ్మెల్యే సీటును కూడా గెలుచుకోలేదన్నారు. కాంగ్రెసు పార్టీని ఖతం చేస్తామనుకున్న పార్టీలే ఖతమవుతాయన్నారు. ఆకాశం మీద ఉమ్మెస్తే మన మీదే పడుతుందన్నారు.

ప్రధాని మన్మోహన్ సింగ్ బలహీనుడన్న భాజపా అగ్రనేత అద్వానీ వ్యాఖ్యలను ఆయన ఖండించారు. భాజపాలో ప్రస్తుతం ఆయనే బలహీనుడన్నారు. కెసిఆర్, కోదండరాం తమ వ్యక్తిగత అజెండాలను తెలంగాణ ప్రజలపై రుద్దుతున్నారని ఎమ్మెల్సీ పాలడుగు వెంకట్ రావు విమర్శించారు. తెలంగాణ, ఉద్యోగుల పేరుతో కోదండరాం తెలంగాణ ప్రజలను మభ్యపెడుతున్నారన్నారు. వ్యక్తిగత ప్రయోజనాలు ప్రజలపై రుద్దడం సరికాదన్నారు. వారి వైఖరి మార్చుకోవాలన్నారు.

Published On October 18, 2011