తెలంగాణ అంశంపై నాకు తెలియదు: ప్రణబ్ ముఖర్జీ

By Srinivas

Published: Saturday, October 22, 2011, 9:02 [IST]

న్యూఢిల్లీ: తెలంగాణ అంశంపై చర్చల విషయం తనకేం తెలియదని కేంద్ర మంత్రి ప్రణబ్ ముఖర్జీ శుక్రవారం సాయంత్రం న్యూఢిల్లీలో అన్నారు. ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఢిల్లీ వెళ్లిన విషయం తెలిసిందే. రాత్రి కిరణ్ ప్రణబ్ కార్యాలయమైన నార్త్ బ్లాక్‌లో కొద్దిసేపు భేటీ అయ్యారు. అనంతరం బయటకు వచ్చిన ప్రణబ్ మాట్లాడుతూ.. తెలంగాణపై చర్చలు కొనసాగుతున్నాయో.. ఆగిపోయాయో తనకు తెలియదని, వాటిపై నాకేలాంటి సమాచారం లేదని ఆయన విలేకరుల వ్యాఖ్యలకు సమాధానంగా చెప్పారు. తెలంగాణపై తనకు ఎలాంటి సమాచారం లేదన్న ప్రణబ్ ముఖర్జీ కోర్ కమిటీ సభ్యుడు కావటం విశేషం.

కిరణ్ ప్రణబ్‌తో రాష్ట్రంలోని తాజా పరిస్థితులపై కీలక సమాలోచనలు జరిపినట్లుగా సమాచారం. కొద్ది రోజుల కిందట ప్రణబ్ నేతృత్వంలోని మినీ కోర్ కమిటీ సభ్యులను ముఖ్యమంత్రి కిరణ్ కలుసుకున్న విషయం తెలిసిందే. ఈ సందర్భంగానే రాష్ట్రంలోని పరిస్థితులను చక్కదిద్దాల్సిందిగా వారు ఆయనకు సూచించారు. ఈ నేపథ్యంలోనే అధిష్ఠానం పిలుపు అందుకున్న ముఖ్యమంత్రి, ప్రదేశ్ కాంగ్రెసు కమిటీ అధ్యక్షుడు ఢిల్లీ వెళ్లారు.

Published On October 22, 2011