తెలంగాణలో సమైక్యాంధ్ర ఆట పాట: వంగపండు

విశాఖపట్నం: త్వరలో తెలంగాణ ప్రాంతంలో తాను సమైక్యాంధ్రకు అనుకూలంగా ఆట - పాట నిర్వహిస్తానని ప్రజా గాయకుడు వంగపండు ప్రసాద రావు శనివారం ప్రకటించారు. విశాఖపట్నంలోని ఆంధ్రా విశ్వవిద్యాలయంలో రాష్ట్రాన్ని సమైక్యంగా ఉంచాలని కోరుతూ కార్యక్రమం నిర్వహించారు. ఈ కార్యక్రమంలో వంగపండు మాట్లాడారు. సమైక్యాంధ్ర వల్ల కలిగే లాభాలను తన ఆటా - పాటా ద్వారా రాష్ట్రం అంతటా ప్రచారం చేస్తానని సీమాంధ్రతో పాటు తెలంగాణ ప్రాంతంలోనూ తాను పర్యటిస్తానని చెప్పారు. రాష్ట్రం సమైక్యంగా ఉంటేనే ఇరు ప్రాంతాలకు లాభమని చెప్పారు.

కాగా వంగపండు సమైక్యాంధ్రకు అనుకూలంగా పాటలు పాడి అక్కడ అందరినీ అలరించారు. ఆయన పాటలకు విద్యార్థులు కూడా చిందేశారు. తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాంపై, కేంద్రం తీరుపై విద్యార్థులు నిరసన వ్యక్తం చేశారు. కేంద్రం రాష్ట్రాన్ని సమైక్యంగానే ఉంచుతున్నట్టు వెంటనే ప్రకటన చేయాలని డిమాండ్ చేశారు. సీమాంధ్రలోని పదమూడి జిల్లాల్లో సమైక్యాంధ్రకు మద్దతుగా ఉద్యమాన్ని తీవ్రతరం చేస్తామని చెప్పారు.

English summary

Vangapandu Prasad Rao said today that he will organize his Ata Pata in Telangana region for support Samaikyandhra. He participated at AU students agitation.