చిక్కుల్లో స్వామిగౌడ్, భూవ్యవహారంపై గవర్నర్‌కు ఫిర్యాదు

By Pratap

Published: Wednesday, October 26, 2011, 16:34 [IST]

హైదరాబాద్: తెలంగాణ సకల జనుల సమ్మెలో కీలక పాత్ర పోషించిన తెలంగాణ నాన్ గెజిటెడ్ ఉద్యోగ సంఘాల జెఎసి నేత స్వామి గౌడ్ చిక్కుల్లో పడ్డారు. ఉద్యోగులకు దక్కాల్సిన ప్లాట్లను ఆయన సొంతం చేసుకున్నారంటూ ఆరోపణలు వచ్చాయి. దీనిపై తెలంగాణ అధికారులు, ఉద్యోగ, ఉపాధ్యాయ, కార్మిక సంఘాల సంయుక్త పోరాట సమితి బుధవారం గవర్నర్‌ నరసింహన్‌కు ఫిర్యాదు చేసింది. హైదరాబాద్, సికింద్రాబాద్ పరిధిలోని ఉద్యోగ సంఘాలకు రావాల్సిన స్థలాలను స్వామిగౌడ్ ఆక్రమించారని సమితి నాయకులు ఆరోపించారు.

తెలంగాణ ఎన్జీవో సంఘాలకు గృహ నిర్మాణాల కోసం కేటాయించిన 160 ఎకరాల స్థలం ఆక్రమణ జరుగుతోందని వారు గవర్నర్‌కు సమర్పించిన వినతిపత్రంలో తెలిపారు. ఈ వ్యవహారంపై సిబిఐ దర్యాప్తునకు ఆదేశించాలని వారు గవర్నర్‌ను కోరారు. స్వామిగౌడ్‌ను అక్రమాల నుంచి కాపాడడానికే సకల జనుల సమ్మెను విమరించారని ఎమ్మార్పీయస్ నేత మందకృష్ణ మాదిగ ఇటీవల ఆరోపించారు కూడా.

Published On October 26, 2011