ఎమ్మెల్యేలపై, చిరు పార్టీపై సిబిఐ విచారణ: ఆనం

By Srinivas

Published: Monday, October 31, 2011, 14:19 [IST]

హైదరాబాద్: తెలంగాణ రాష్ట్ర సమితిలో చేరిన కాంగ్రెసు శాసనసభ్యులపై సిబిఐ విచారణ జరిపిస్తే ఎంతకు అమ్ముడు పోయారో బయట పడుతుందని శ్రీ పొట్టి శ్రీరాములు నెల్లూరు జిల్లా శాసనసభ్యుడు ఆనం వివేకానంద రెడ్డి సోమవారం సంచలన వ్యాఖ్యలు చేశారు. ఇద్దరు కాంగ్రెసు ఎమ్మెల్యేలు, ఒక కాంగ్రెసు అనుబంధ ఎమ్మెల్యే డబ్బులకు అమ్ముడు పోయారని ఆరోపించారు. వారిపై సిబిఐ విచారణ జరిపించాలన్నారు. అవసరమైతే తిరుపతి శాసనసభ్యుడు చిరంజీవి స్థాపించిన ప్రజారాజ్యం పార్టీ కాంగ్రెసులో విలీనం కావడం పైనా సిబిఐ విచారణ జరిపించుకోవచ్చునన్నారు.

ఇటీవల క్యాష్ ఫర్ ట్రాన్స్‌ఫర్ చాలా అనాగరికంగా తయారయిందన్నారు. ఒక పార్టీ నుండి గెలిచిన వారు మరో పార్టీలో చేరుతున్న ఆరోపణలు ఇటీవల చాలా వినిపిస్తున్నాయన్నారు. ఇలాంటి శాసనసభ్యుల అమ్మకాలు ఆపాలంటే సిబిఐ విచారణ జరిపించాలన్నారు. ధనవంతులు, అత్యాశపరులు రాజకీయాల్లోకి వస్తే ఇలాగే ఉంటుందన్నారు. టిఆర్ఎస్‌లోకి వెళ్లిన కాంగ్రెసు ఎమ్మెల్యేలు ప్యాకేజీ మాట్లాడుకున్నారన్నారు. వారు పార్టీ మారటం బాధాకరమని, వారిది తొందరపాటు చర్య అన్నారు. ముఖ్యమంత్రి కిరణ్ కుమార్ రెడ్డి సర్కారు మైనార్టీలో పడలేదన్నారు.

భూముల కేటాయింపుల విధానంపై త్వరలో ప్రభుత్వం నిర్ణయం తీసుకుంటుందన్నారు. హౌస్ కమిటీపై సర్కారు గతంలో ఇచ్చిన మాటకు కట్టుబడి ఉందన్నారు.

Published On October 31, 2011