టిఆర్ఎస్‌పై శ్రీధర్ బాబు గుర్రు, ఎమ్మెల్యేలకు సలహా

By Srinivas

Published: Monday, October 31, 2011, 9:53 [IST]

కరీంనగర్: తెలంగాణ రాష్ట్ర సమితి తమ రాజకీయ ప్రయోజనాల కోసం వలసలను ప్రోత్సహిస్తోందని పౌరసరఫరాల శాఖ మంత్రి శ్రీధర్ బాబు సోమవారం కరీంనగర్ జిల్లాలో ఆగ్రహం వ్యక్తం చేశారు. పార్టీ నుండి ముగ్గురు శాసనసభ్యులు వెళ్లి పోయినంత మాత్రాన కాంగ్రెసుకు వచ్చే నష్టమేమీ లేదన్నారు. తెలంగాణ కావాలంటే కాంగ్రెసు పార్టీ సహకారం ఖచ్చితంగా ఉండాల్సిందేనన్నారు. తమ పార్టీ సహకారం లేకుండా తెలంగాణ అసాధ్యమన్నారు. టిఆర్ఎస్‌లోకి వెళ్లిన ఎమ్మెల్యేలు పునరాలోచించుకోవాలని ఆయన విజ్ఞప్తి చేశారు. తెలంగాణలో రచ్చబండను అడ్డుకోవద్దని కోరారు.

కాగా రామగుండం శాసనసభ్యుడు సోమారపు సత్యనారాయణ, స్టేషన్ ఘనపురం ఎమ్మెల్యే రాజయ్య, మహబూబ్ నగర్ జిల్లా ఎమ్మెల్యే జూపల్లి కృష్ణారావు ఆదివారం టిఆర్ఎస్ అధ్యక్షుడు కల్వకుంట్ల చంద్రశేఖర రావు ఆధ్వర్యంలో ఆ పార్టీ తీర్థం పుచ్చుకున్న విషయం తెలిసిందే. వారు గులాబీ కండువ వేసుకోవడంపై కాంగ్రెసు నేతలు తీవ్రంగా స్పందిస్తున్నారు. రాజకీయ లబ్ధి కోసమే వారు పార్టీ మారారాని పిసిసి చీఫ్ బొత్స సత్యనారాయణ, వాళ్లు తొందర పడ్డారని సీనియర్ నేత కె కేశవ రావు అన్నారు.

Published On October 31, 2011