బాబుపై వైయస్ విజయమ్మ పిల్ విచారణ వాయిదా

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు ఆస్తులపై పులివెందుల శాసనసభ్యురాలు వైయస్ విజయమ్మ వేసిన పిటిషన్‌పై విచారణను రాష్ట్ర అత్యున్నత న్యాయస్థానం హైకోర్టు వాయిదా వేసింది. వైయస్ విజయమ్మ ఇటీవల బాబు ఆస్తులపై దాదాపు 2500 పేజీల పిల్ వేశారు. దీనిపై హైకోర్టు మంగళవారం విచారణ ప్రారంభించింది. న్యాయమూర్తులు సుమారు గంటపాటు ఇరువురి వాదనలు విన్నారు. అనంతరం విచారణను వాయిదా వేశారు. మళ్లీ ఎప్పుడు విచారణ చేపట్టేది త్వరలో తెలియజేస్తామని చెప్పారు. విజయమ్మ పిటిషన్ అంశాలు మా దృష్టికి వచ్చాయని మేం వాదనలు వింటామని న్యాయమూర్తులు చెప్పారు.

చంద్రబాబు సిఎం హోదాలో అక్రమంగా నిధులు మళ్లించారని విజయమ్మ తరఫు న్యాయవాది సుశీల్ కుమార్ వాదించారు. దుబాయ్, సింగపూర్, హాంగాంగ్, మలేషియా దేశాలకు హవాలా ద్వారా మనీలాండరింగ్‌కు పాల్పడ్డారన్నారు. కెజి బేసిన్‌ను ముఖేష్ అంబానీకి అప్పనంగా అప్పగించారన్నారు. ఐఎంజి భూముల కేటాయింపులో భారీ అక్రమాలు చోటు చేసుకున్నాయన్నారు. ఐఎంజికి ప్రభుత్వ భూమిని కట్టబెట్టారని, ఐఎంజికి క్యాబినెట్ అనుమతులు లేవన్నారు.

కాగా చంద్రబాబు తన హయాంలో భారీ అక్రమాలకు పాల్పడ్డారని వైయస్ విజయమ్మ హైకోర్టులో పిల్ వేసిన విషయం తెలిసిందే. అందులో బాబు అధికారంలో ఉన్నప్పుడు ఎలా అక్రమాలకు పాల్పడ్డారో వివరించారు. ఆయన ఆస్తులు ఎప్పుడెప్పుడు ఎంత పెరిగాయో వివరించారు. ప్రతివాదుల్లో సుజనా చౌదరి, ఈనాడు అధినేత రామోజీ రావు తదితర ఇరవై పేర్లను చేర్చారు.

English summary

High Court adjourned Pulivendula MLA YS Vijayamma's petition against TDP chief Nara Chandrababu Naidu properties.