ఎమ్మార్ ప్రాపర్టీస్ కేసులో కోనేరు ప్రసాద్ అరెస్టు

హైదరాబాద్: ఎమ్మార్ ప్రాపర్టీస్ అక్రమాల కేసులో సిబిఐ అధికారులు స్టైలిష్ హోమ్స్ మేనేజింగ్ డెైరెక్టర్ కోనేరు ప్రసాద్‌ను గురువారం సాయంత్రం అరెస్టు చేశారు. ఈ అరెస్టును సిబిఐ జాయింట్ డైరెక్టర్ లక్ష్మినారాయణ ధ్రువీకరించారు. ఆయనను ఎక్కడ అరెస్టు చేశారనే విషయం మాత్రం తెలియడం లేదు. ఆయనను రేపు శుక్రవారం ఉదయం హైదరాబాదులోని నాంపల్లిలో గల ప్ర్తత్యేక కోర్టులో హాజరు పరిచే అవకాశాలున్నాయి. పక్కా ఆధారాలు సేకరించిన తర్వాతనే ప్రసాద్‌ను సిబిఐ అధికారులు అరెస్టు చేసినట్లు తెలుస్తోంది. సాక్షుల వాంగ్మూలాలను రికార్డు చేసిన తర్వాత కోనేరు ప్రసాద్‌ను సిబిఐ అధికారులు అరెస్టు చేసినట్లు సమాచారం. పార్థసారథి వంటివారు ఇచ్చిన వాంగ్మూలాల ఆధారంగా ఈ అరెస్టు జరిగినట్లు తెలుస్తోంది.

ఆంధ్రప్రదేశ్ మౌలిక సదుపాయాల కల్పనా సంస్థ (ఎపిఐఐసి)కి తెలియకుండా ఎమ్మార్ ప్రాపర్టీస్, స్టైలిష్ హోమ్స్ ఒప్పందం చేసుకుని విల్లాలను అధిక ధరలకు విక్రయించినట్లు ఆరోపణలున్నాయి. గజానికి 25 నుంచి 50 వేల రూపాయల ధరలకు కోనేరు ప్రసాద్ విల్లాలను విక్రయించి రికార్డుల్లో ఐదు వేల రూపాయల ధరనే రికార్డు చేసినట్లు తెలుస్తోంది. విల్లాల విక్రయంపై కోనేరు ప్రసాద్ నివాసంలో ఒప్పందం కుదిరినట్లు తెలుస్తోంది. స్టైలిష్ హోమ్స్ తప్పుడు లెక్కల వల్ల ఎపిఐఐసికి భారీగా నష్టం వాటిల్లింది.

కోనేరు ప్రసాద్ అరెస్టుతో ఎమ్మార్ ప్రాపర్టీస్ కుంభకోణం కేసు కీలకమైన మలుపు తిరిగింది. ఎమ్మార్ ప్రాపర్టీస్, వైయస్ జగన్ ఆస్తుల కేసుల్లో ఇదే తొలి అరెస్టు. ఎమ్మార్ ప్రాపర్టీస్ అక్రమాలపై సిబిఐ ఆగస్టు 17వ తేదీన కేసు నమోదు చేసింది.

English summary

Stylish Homes MD Koneru Prasad arrested by CBI in Emaar Properties case.