కనిమొళి బెయిల్ పిటిషన్‌ను తోసిపుచ్చిన కోర్టు

By Pratap

Published: Thursday, November 3, 2011, 11:20 [IST]

న్యూఢిల్లీ: జైలు నుంచి బయటపడాలనే డిఎంకె పార్లమెంటు సభ్యురాలు కనిమొళి ఆశలు వమ్మయ్యాయి. 2జి స్పెక్ట్రమ్ కుంభకోణం కేసులో తమిళనాడు మాజీ ముఖ్యమంత్రి కరుణానిధి ముద్దుల కూతురు కనిమొళి బెయిల్ పిటిషన్‌ను కోర్టు గురువారం తోసిపుచ్చింది. ఆమెతో పాటు మరో ఏడుగురి బెయిల్ పిటిషన్లను కూడా కోర్టు తోసిపుచ్చింది. విచారణను కోర్టు ఈ నెల 11వ తేదీకి వాయిదా వేసింది. కనిమొళి గురువారం ఉదయం ఢిల్లీ కోర్టులో తన తల్లిని, భర్తను, కుమారుడిని కలుసుకున్నారు. గత ఐదు నెలలుగా కనిమొళి జైలులోనే ఉంటున్నారు.

తన బెయిల్ దరఖాస్తుపై న్యాయమూర్తి నిర్ణయాన్ని వినడానికి కనిమొళి గురువారం ఉదయం తీహార్ జైలు నుంచి పాటియాలా హౌస్ కోర్టుకు చేరుకున్నారు. న్యాయమూర్తి నిర్ణయం వినడానికి సినీ నటి, రాజకీయ నాయకురాలు కుష్బూ, డిఎంకె నేత టిఆర్ బాలు కోర్టుకు వచ్చారు. కోర్టు నుంచి శుభవార్త వస్తుందని వేచి చూసిన డిఎంకె కార్యకర్తలకు నిరాశే ఎదురైంది.

Published On November 3, 2011