నామా మాటేమిటని బాబును ప్రశ్నించిన తెరాస

By Pratap

Published: Thursday, November 3, 2011, 16:18 [IST]

హైదరాబాద్: తెలుగుదేశం పార్టీ పార్లమెంటు సభ్యుడు నామా నాగేశ్వర రావు అక్రమాలపై ఏమంటారంటూ ఆ పార్టీ అధ్యక్షుడు నారా చంద్రబాబునాయుడిని తెలంగాణ రాష్ట్ర సమితి (తెరాస) నాయకుడు శ్రవణ్ ప్రశ్నించారు. నామా నాగేశ్వరరావుకు చెందిన మధుకాన్ సంస్థ తమిళనాడు రోడ్ల నిర్మాణంలో అక్రమాలకు పాల్పడిందని ఆయన గురువారం మీడియా ప్రతినిధుల సమావేశంలో ఆరోపించారు. నామా అక్రమాలపై మీడియాలో వస్తున్న కథనాల మీద స్పందించాలని ఆయన గురుావంర మీడియా ప్రతినిధుల సమావేశంలో చంద్రబాబును డిమాండ్ చేశారు. తమిళనాడులో 81 కిలోమీటర్ల మేర నిర్మించిన జాతీయ రహదారిలో నాణ్యతాలోపం ఉందని, పూర్తి స్థాయి నిర్మాణం పూర్తి కాకుండానే టోల్ ఫీజు వసూలు చేశారని ఆయన అన్నారు. దానిపై సిబిఐ దర్యాప్తు చేసిందని, కాంగ్రెసుతో తెలుగుదేశం పార్టీ ఒప్పందం కారణంగానే మధుకాన్ సంస్థకు క్లీన్ చిట్ లభించిందని ఆయన అన్నారు. నామా వ్యవహారంపై తెహెల్కా కూడా రాసిందని ఆయన చెప్పారు. కాంట్రాక్టులు, బినామీల కారణంగానే చంద్రబాబు నామాను రాజ్యసభకు పంపించారని ఆయన అన్నారు.

కాగా, రైతు పోరు బాట నిర్వహిస్తున్న చంద్రబాబుపై తెరాస శాసనసభా పక్ష నాయకుడు ఈటెల రాజేందర్ విరుకుచుపడ్డారు. వ్యవసాయం దండుగ ఆ రోజు చంద్రబాబు అన్నారని గుర్తు చేస్తూ ఆ మాటలన్నప్పుడు ఈనాడు దినపత్రికలో వచ్చిన కార్టూన్‌ను ఆయన గుర్తు చేశారు. చంద్రబాబుకు ఆయన భార్య పల్లెంలో అన్నానికి బదులు కంప్యూటర్ వడ్డిస్తున్నట్లు అప్పట్లో కార్టూన్ వచ్చిందని ఆయన అన్నారు. చంద్రబాబు రైతుల కోసం కొట్లాడుతున్నట్లు ఢిల్లీకి వెళ్లి ఫోజులు కొట్టారని, చంద్రబాబు అప్పట్లో వ్యవసాయం దండుగ అని అన్నారని ఆయన విడిగా మీడియా ప్రతినిధుల సమావేశంలో అన్నారు. రైతులను ప్రభుత్వం ఆదుకోవడం లేదని ఆయన అన్నారు. యాభై రోజులుగా వర్షాలులేక పత్తి పంట ఎండిపోయిందని ఆయన అన్నారు. కాంగ్రెసు ప్రభుత్వ హయాంలో ప్రతి రోజూ రైతులు ఆత్మహత్యలు చేసుకుంటున్నారని ఆనయ అన్నారు. తెలంగాణలో కేవలం 456 మండలాలను మాత్రమే కరువు ప్రాంతాలుగా ప్రకటించడాన్ని ఆయన వ్యతిరేకించారు. ఎరువుల ధరలు పెంచింది కాంగ్రెసు ప్రభుత్వమేనని ఆయన అన్నారు.

Published On November 3, 2011