చిరంజీవి అభిమానులకు తిరుపతిలో అవమానం

చిత్తూరు: స్థానిక శాసనసభ్యుడు చిరంజీవి అభిమానులకు రేణిగుంట విమానాశ్రయంలో శుక్రవారం అవమానం ఎదురైంది. ముఖ్యమంత్రి కిరణ్ కుమార్ రెడ్డి తిరుపతికి వస్తుండటంతో ఆయనకు స్వాగతం పలికేందుకు చిరంజీవి వర్గానికి చెందిన కాంగ్రెసు పార్టీ కార్యకర్తలు, అభిమానులు పెద్ద ఎత్తున రేణిగుంట విమానాశ్రయానికి చేరుకున్నారు. అయితే పోలీసులు వారిని విమానాశ్రయంలోకి అనుమతించలేదు. దీంతో వారు పోలీసులతో వాగ్వాదానికి దిగారు. తమను ఎంతకూ లోపలకు అనుమతించక పోవడంతో వారు విమానాశ్రయం ముందు ఆందోళనకు దిగారు.

కాగా ముఖ్యమంత్రి కిరణ్ శుక్రవారం తిరుపతిలో మీసేవను ప్రారంభించనున్నారు. మీసేవ ద్వారా నివాస, కుల, ఆదాయ ధ్రువీకరణ పత్రాలు మొదలు ఆడంగల్, రిజిస్ట్రేషన్ తదితర 12 రకాల పత్రాల కోసం ప్రభుత్వంలోని వివిధ కార్యాలయాల చుట్టూ తిరగకుండా ఒకేచోట పొందేలా ప్రభుత్వం కొత్తగా పథకానికి శ్రీకారం చుట్టింది. అంతకుముందు గవర్నర్ నరసింహన్ జన్మదినం సందర్భంగా కిరణ్ ఆయనకు శుభాకాంక్షలు తెలిపి బేగంపేట విమానాశ్రయం నుండి తిరుపతి బయలుదేరి వెళ్లారు.

English summary

Police obstructed Tirupati MLA Chiranjeevi fans at Renigunta Air Port to enter in to port.