వైయస్ జగన్ అభిమానుల వీరంగం, లాఠీఛార్జ్

By Srinivas

Published: Friday, November 4, 2011, 12:56 [IST]

హైదరాబాద్: కర్నాటక మాజీ మంత్రి గాలి జనార్ధన్ రెడ్డి ఓబుళాపురం మైనింగ్ కేసులో వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి విచారణ సందర్భంగా కోఠిలోని సిబిఐ కార్యాలయం ముందు శుక్రవారం తీవ్ర ఉద్రిక్త వాతావరణం ఏర్పడింది. జగన్‌ను విచారిస్తున్నారని తెలుసుకొని భారీగా పార్టీ కార్యకర్తలు, జగన్ అభిమానులు అక్కడకు తరలి వచ్చారు. సిబిఐ కార్యాలయం ముందు వీరంగం సృష్టించడంతో పోలీసులు లాఠీఛార్జ్ చేసి చెదరగొట్టారు. అభిమానులు సిబిఐ కార్యాలయ బోర్డును తొలగించారు. పలుసార్లు వారు లోనికి చొచ్చుకెళ్లే ప్రయత్నాలు చేయడంతో పోలీసులు అడ్డుకున్నారు. పోలీసులు కోఠి - రాంకోఠి రహదారిని మూసి వేశారు. సిబిఐ కార్యాలయ పరిసరాల్లోకి ఎవరూ రాకుండా అడ్డుకున్నారు.

కార్యకర్తలు ముఖ్యమంత్రి కిరణ్ కుమార్ రెడ్డి, ఏఐసిసి అధ్యక్షురాలు సోనియా గాంధీకి వ్యతిరేకంగా నినాదాలు చేశారు. ఒక అభిమాని కోఠి చౌరస్తాలోని హౌర్డింగ్ ఎక్కాడు. దీంతో పరిస్థితి ఉద్రిక్తంగా మారింది. కాగా సిబిఐ కార్యాలయానికి అమలాపురం పార్లమెంటు సభ్యుడు సబ్బం హరి, పలువురు ఎమ్మెల్యేలు వచ్చారు. ఈ సందర్భంగా సబ్బం హరి మాట్లాడుతూ దోషులను పట్టుకునేందుకే సిబిఐ జగన్‌ను ప్రశ్నిస్తోందని చెప్పారు. ఓఎంసి కేసులో గతంలో హోంమంత్రి సబితా ఇంద్రారెడ్డిని విచారించారని ఇప్పుడు సమాచార సేకరణ కోసం జగన్‌ను విచారిస్తున్నారని అన్నారు. కాగా గంటన్నర నుండి సిబిఐ జగన్‌ను ప్రశ్నిస్తోంది.

Published On November 4, 2011