గాలి భార్య కంపెనీపై ఎఫ్ఐఆర్ దాఖలు చేసిన సిబిఐ

By Pratap

Published: Saturday, November 5, 2011, 17:00 [IST]

బెంగళూరు: కర్ణాటక మాజీ మంత్రి గాలి జనార్దన్ రెడ్డి భార్య అరుణ లక్ష్మి పేరు మీద ఉన్న అసోసియేటెడ్ మైనింగ్ కంపెనీపై సిబిఐ అధికారులు ఎఫ్ఐఆర్ నమోదు చేసినట్లు తెలుస్తోంది. గనుల అక్రమ తవ్వకాల కేసులో ఈ ఎఫ్ఐఆర్ నమోదైనట్లు సమాచారం. మొత్తం 21 మందిపై సిబిఐ ఎఫ్ఐఆర్ శనివారం దాఖలు చేసినట్లు తెలుస్తోంది. బెంగుళూర్‌లో డిజిగ్నేటెడ్ కోర్టులో ఎఫ్ఐఆర్ దాఖలు చేసినట్లు సమాచారం. నిందితుల పేర్లను సిబిఐ వెల్లడించడం లేదు.

ఓబుళాపురం మైనింగ్ కంపెనీ (ఒఎంసి) గత నెలలో ఎఫ్ఐర్ దాఖలు చేసిన నెల రోజులు తర్వాత అసోసియేటెడ్ మైనింగ్ కంపెనీపై ఎఫ్ఐఆర్ దాఖలైంది. గనుల అక్రమ తవ్వకాలపై సెప్టెంబర్ మొదటివారంలో సిబిఐ అధికారులు ఎఫ్ఐఆర్ నమోదు చేసి, గాలి జనార్దన్ రెడ్డిని, బివి శ్రీనివాస రెడ్డిని అరెస్టు చేశారు. ప్రస్తుతం వాళ్లు హైదరాబాదులోని చంచల్‌గుడా జైలులో ఉన్నారు. తాజా సంఘటన గాలి జనార్దన్ రెడ్డికి మరో దెబ్బ.

Published On November 5, 2011