విరమణ కాదు విరామం, ఆజాద్ హామీతోనే: కోమటిరెడ్డి

By Srinivas

Published: Wednesday, November 9, 2011, 14:53 [IST]

హైదరాబాద్: తాను దీక్షను విరమించడం లేదని కేవలం విరామం మాత్రమే ఇస్తున్నానని మాజీ మంత్రి కోమటిరెడ్డి వెంకట్ రెడ్డి బుధవారం అన్నారు. ప్రత్యేక తెలంగాణ రాష్ట్రం కోరుతూ తొమ్మిది రోజులుగా ఆయన దీక్ష చేస్తున్న విషయం తెలిసిందే. కాంగ్రెసు పార్టీ పార్లమెంటు సభ్యులు, కేంద్ర మంత్రి గులాం నబీ ఆజాద్ విజ్ఞప్తి మేరకు ఆయన నిమ్స్‌లో తన దీక్షను విరమించారు. పార్లమెంటు ఎదుట ఆత్మహత్య చేసుకున్న యాదగిరి తల్లి చంద్రమ్మ కోమటిరెడ్డికి నిమ్మరసం ఇచ్చి దీక్షను విరమింప జేసింది. ఈ సందర్భంగా కోమటిరెడ్డి మాట్లాడారు. తెలంగాణ ఏర్పాటే తన అంతిమ లక్ష్యమన్నారు. సీమాంధ్ర పెట్టుబడిదారుల వల్లే తెలంగాణ ఆలస్యమైందన్నారు. త్వరలో తెలంగాణ కోసం భవిష్యత్తు కార్యాచరణ ప్రకటిస్తానన్నారు.

తెలంగాణపై త్వరలో కేంద్రం స్పష్టమైన ప్రకటన చేస్తుందని ఆజాద్ హామీ ఇచ్చినందువల్లే దీక్ష విరమిస్తున్నట్లు చెప్పారు. ఆజాద్, ఎంపీల కోరిక మేరకే దీక్షను విరమించినట్లు చెప్పారు. కేంద్ర నాయకత్వం, ప్రభుత్వంపై ఒత్తిడి తెచ్చేందుకే తాను దీక్షను చేపట్టానన్నారు. కాగా కోమటిరెడ్డి దీక్షా విరమణకు తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్, తెలంగాణ ఉద్యోగ సంఘాల నేతలు స్వామి గౌడ్, శ్రీనివాస్, ఎంపీలు కె కేశవ రావు, మందా జగన్నాథం, కోమటిరెడ్డి రాజగోపాల్ రెడ్డి, గుత్తా సుఖేందర్ రెడ్డి తదితరులు హాజరయ్యారు. దీక్ష ముగిసిన అనంతరం కోమటిరెడ్డికి వైద్యులు పరీక్షలు చేశారు.

Published On November 9, 2011