ముహూర్తం 11, కెసిఆర్‌ను కలిసిన టిడిపి ఎమ్మెల్యేలు

By Srinivas

Published: Wednesday, November 9, 2011, 12:27 [IST]

హైదరాబాద్: తెలంగాణ తెలుగుదేశం పార్టీకి చెందిన నలుగురు శాసనసభ్యులు బుధవారం తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావును కలిసినట్లుగా తెలుస్తోంది. తెలుగుదేశం పార్టీకి చెందిన నలుగురు ఎమ్మెల్యేలు టిఆర్ఎస్‌లో చేరనున్నట్లు వార్తలు వచ్చిన విషయం తెలిసిందే. జుక్కల్ శాసనసభ్యుడు హనుమంత్ షిండే, కల్వకుర్తి ఎమ్మెల్యే జైపాల్ యాదవ్, అచ్చంపేట ఎమ్మెల్యే రాములు, చొప్పదండి ఎమ్మెల్యే సుద్దాల దేవయ్యలు బుధవారం కెసిఆర్‌ను కలిశారని సమాచారం. వారి చేరికకు దాదాపు రంగం సిద్ధమైపోయింది. ఈ నెల 11వ తేదిన కెసిఆర్ సమక్షంలో తెలంగాణ భవనంలో వారు టిఆర్ఎస్ పార్టీ తీర్థం పుచ్చుకోనున్నారని సమాచారం. ఇంతకుముందు కూడా వారు కెసిఆర్‌తో చర్చలు జరిపారినట్లు వార్తలు వచ్చాయి.

కాగా మరికొందరు తెలంగాణ తెలుగుదేశం పార్టీ నేతలు కూడా వీరి బాటలోనే పయనించే అవకాశాలు కనిపిస్తున్నాయి. ఇప్పటికే ఇద్దరు ఎమ్మెల్యేలు టిడిపి నుండి టిఆర్ఎస్‌లో చేరగా నాగం గ్రూపు పార్టీ నుండి బయటకు వెళ్లి సొంతగా ఉద్యమిస్తోంది. బాబు రెండు కళ్ల సిద్ధాంతం కారణంగా ప్రజల్లో తిరగలేని పరిస్థితి ఉందని భావించిన పలువురు టిడిపి ఎమ్మెల్యేలు పార్టీని వీడుతున్నట్లుగా కనిపిస్తోంది. కాగా బాబు వైఖరి ఇలాగే ఉంటే తెలంగాణలో టిడిపి ఖాళీ కావడం ఖాయమని తెలంగాణవాదులు హెచ్చరిస్తున్నారు.

అయితే తాను టిఆర్ఎస్‌లో చేరుతున్నట్లు వచ్చిన వార్తలను హనుమంత్ షిండే ఖండించారు. తాను పార్టీ మారాలనుకుంటే పోచారం శ్రీనివాస్ రెడ్డితో పాటే వెళ్లే వాడినన్నారు. తమపై అవాస్తవ కథనాలు తీసుకు రావద్దని ఆయన కోరారు.

Published On November 9, 2011