ఈనాడు, ఆంధ్రజ్యోతిపై విరుచుకుపడ్డ అంబటి రాంబాబు

By Srinivas

Published: Friday, November 11, 2011, 16:49 [IST]

హైదరాబాద్: ఈనాడు, ఆంధ్రజ్యోతిలపై వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు శుక్రవారం తీవ్రస్థాయిలో విరుచుకు పడ్డారు. తమ పార్టీ అధ్యక్షుడు వైయస్ జగన్మోహన్ రెడ్డి చక్రబంధంలో ఉన్నారంటూ విషం చిమ్ముతున్నారని ధ్వజమెత్తారు. సిబిఐ దర్యాఫ్తులో భాగంగా జరుగుతున్న విచారణలో ఏం జరుగుతుందో ఈనాడు, ఆంధ్రజ్యోతి పత్రికలకు ముందే ఎలా తెలుస్తుందని ప్రశ్నించారు. కాంగ్రెసు, తెలుగుదేశం, ఆ రెండు పత్రికలకు సమాచారం ఇచ్చేందుకే సిబిఐ విచారణ జరుగుతోందా అని ప్రశ్నించారు. రామోజీ రాస్తున్న రాతలు గురివింద గింజను గుర్తుకు తెస్తున్నాయన్నారు. ఈనాడు తోక పత్రికకు పెట్టుబడులు ఎక్కడి నుండి వచ్చాయో చెప్పాలన్నారు.

జగన్‌పై బురద జల్లడమే ఆ రెండు పార్టీల లక్ష్యమని, సిబిఐ విచారణ రహస్యంగా జరుగుతోందా లేక ఆ రెండు పత్రికలను కూర్చోబెట్టుకొని దర్యాఫ్తు చేస్తున్నారా అని ప్రశ్నించారు. జగన్ కేసు విషయంలో సిబిఐ జాయింట్ డైరెక్టర్ లక్ష్మీ నారాయణ వ్యవహరిస్తోన్న తీరు సరిగా లేదన్నారు. ఏ తప్పూ చేయలేదని తెలిసినా కూడా జగన్‌ను ఆబాసుపాలు చేసే ప్రయత్నం జరుగుతోందన్నారు. ఎల్లో మీడియా జాగ్రత్తగా వ్యవహరించక పోతే ప్రజలే వారికి తగిన గుణపాఠం చెబుతారన్నారు.

Published On November 11, 2011