జగన్ ఎమ్మెల్యేకు చుక్కెదురు, నో చెప్పిన ఆజాద్?

By Srinivas

Published: Friday, November 11, 2011, 8:56 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు శాసనసభ్యురాలు కొర్ల భారతికి కాంగ్రెసు పార్టీ నేతల నుండి చుక్కెదురైనట్లుగా సమాచారం. జగన్ వర్గానికి చెందిన టెక్కలి శాసనసభ్యురాలు కొర్ల భారతి తిరిగి కాంగ్రెసులోకి వెళ్తారన్న ఊహాగానాలు జోరుగా వినవచ్చిన విషయం తెలిసింది. అయితే ఇటీవల ఆమె ఢిల్లీ వెళ్లారు. ఆ తర్వాత శ్రీకాకుళం వచ్చి తాను పార్టీ మారేది లేదని స్పష్టం చేశారు. అయితే ఆమె కాంగ్రెసులోకి తిరిగి వెళ్లాలనుకున్నప్పటికీ కాంగ్రెసు పార్టీ పెద్దల నుండి చుక్కెదురు కావడం, వైయస్సార్ పార్టీ నేతల ఒత్తిడి వల్లే పార్టీ మారే ఆలోచన లేదని ప్రకటించినట్లుగా సమాచారం.

ఆమె ఢిల్లీ వెళ్లినప్పుడు అక్కడ ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణను కలిశారు. కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్‌ను కలవమని బొత్స ఆమెకు సూచించారట. ఆయితే ఆమె ఆజాద్‌ను కలిసేందుకు ప్రయత్నించినప్పటికీ అపాయింట్‌మెంట్ ఇవ్వలేదట. దీంతో ఆమె తిరిగి వచ్చారు. అంతలోనే భారతి కాంగ్రెసులోకి తిరిగి వెళ్తుందన్న వార్తలు జోరందుకోవటంతో వైయస్సార్ కాంగ్రెసు నేతలు ఆమెపై ఒత్తిళ్లు తీసుకు రావడం వెంటనే ఆమె పార్టీ మారనంటూ చెప్పడం జరిగిపోయాయట.

Published On November 11, 2011