తెలంగాణ వెనక్కి, ఇప్పుడు కాదన్న కేంద్ర మంత్రి ఆజాద్

By Srinivas

Published: Friday, November 11, 2011, 16:39 [IST]

హైదరాబాద్: తెలంగాణపై కేంద్రం అప్పుడే నిర్ణయం తీసుకోదని కేంద్రమంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ శుక్రవారం న్యూఢిల్లీలో స్పష్టం చేశారు. తెలంగాణ అంశంపై ఇప్పటి వరకు రాష్ట్ర స్థాయిలో నేతలతో చర్చలు ముగిశాయన్నారు. ఇక జాతీయస్థాయిలో చర్చించాల్సి ఉందన్నారు. ఆ తర్వాతే నిర్ణయం ఉంటుందని తేల్చి చెప్పేశారు. తెలంగాణ సమస్య పరిష్కరించడానికి రాష్ట్రంలోని మూడు ప్రాంతాల వారితో చర్చిస్తామని ఆయన స్పష్టం చేశారు.

కాగా అంతకుముందు గులాం నబీ ఆజాద్‌తో భేటీ అయిన ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ సైతం ఇదే తరహా అభిప్రాయం వ్యక్తం చేసిన విషయం తెలిసిందే. పార్లమెంటు సమావేశాలలోగా తెలంగాణపై కేంద్రం నిర్ణయం తీసుకుంటుందని ఆయన అభిప్రాయపడుతూ అదే సమయంలో నిర్ణయం తొందరపడి తీసుకోవాలని కేంద్రం అనుకోవడం లేదన్నారు.

Published On November 11, 2011