కెసిఆర్‌కు పోలవరం బహుమతి, జగన్‌తో లింకు: ఎర్రబెల్లి

హైదరాబాద్: ప్రత్యేక తెలంగాణ రాష్ట్ర కోసం ఉధృతంగా సాగుతున్న సకల జనుల సమ్మెను ఆపివేసినందుకు తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు పోలవరం టెండర్లు బహుమతిగా దక్కాయని తెలుగుదేశం పార్టీ సీనియర్ శాసనసభ్యుడు ఎర్రబెల్లి దయాకర రావు శుక్రవారం ఆరోపించారు. పోలవరం టెండర్లలో జరిగిన అక్రమాలపై విచారణ జరిపించాలని తెలంగాణ తెలుగుదేశం నేతలు మధ్యాహ్నం గవర్నర్ నరసింహన్‌ను కలిసి విజ్ఞప్తి చేశారు. అనంతరం ఎర్రబెల్లి మీడియాతో మాట్లాడారు. పోలవరం టెండర్లలో అవతవకలు జరిగాయని వాటిపై సిట్టింగ్ జడ్జితో విచారణ జరిపించాలని తాము గవర్నర్‌ను కోరినట్లు చెప్పారు. గవర్నర్ సానుకూలంగా స్పందించారన్నారు.

పోలవరం అక్రమాలలో ముఖ్యమంత్రి కార్యాలయం పాత్ర ఉందని ఆయన ఆరోపించారు. ఆయన స్పందించకుంటే కేంద్రానికి ఫిర్యాదు చేస్తామని అవసరమైతే కోర్టుకు వెళతామన్నారు. పదేళ్లుగా కాంగ్రెసుకు కష్టం వచ్చినప్పుడల్లా కెసిఆర్ ఆదుకుంటున్నారని విమర్శించారు. కాంగ్రెసు, వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డితో కుమ్మక్కు అయిందెవరో త్వరలో బయటపడుతుందన్నారు. అవసరమైతే ప్రభుత్వంపై అవిశ్వాస తీర్మానం ప్రవేశ పెడతామన్నారు. టెండర్ల అక్రమాలలో టిఆర్ఎస్, కాంగ్రెసు స్పందించనందునే గవర్నర్‌కు ఫిర్యాదు చేసినట్లు చెప్పారు.

English summary

TDP senior MLA Errabelli Dayakar Rao accused that Polavaram tenders is gift to TRS chief K Chandrasekhar Rao for withdraw Sakala Janula Strike.