తెలంగాణపై దిక్కుతోచని స్థితిలో సోనియా గాంధీ

By Pratap

Published: Friday, November 11, 2011, 21:10 [IST]

న్యూఢిల్లీ: తెలంగాణపై కాంగ్రెసు అధ్యక్షురాలు సోనియా గాంధీ దిక్కు తోచని స్థితిలో పడినట్లు కనిపిస్తున్నారు. తెలంగాణకు వ్యతిరేకంగా పార్టీ అధిష్టానంలో అంతర్గత నిర్ణయం జరిగిపోయినట్లు భావిస్తున్నారు. అందుకు అనుగుణంగా నిర్ణయాన్ని వెల్లడించడం మాత్రం అంత సులభంగా కనిపించడం లేదు. పార్టీ విధానం రెండో ఎస్సార్సీ అంటూ, తెలంగాణపై కూడా రెండో ఎస్సార్సీ వేయడమే మంచిదని ఎఐసిసి అధికార ప్రతినిధి రషీద్ అల్వీ చేత ప్రకటింపజేసిన అధిష్టానం దానిపై ప్రతిస్పందనలను చూసి వెనక్కి తగ్గింది. రెండు మూడు రోజుల్లో లేదా వారం రోజుల్లో రెండో ఎస్సార్సీ వేయాలనే నిర్ణయాన్ని ప్రకటించాలని కాంగ్రెసు అధిష్టానం భావించింది. అయితే, అది తెలివైన పని కాదని తాజాగా అర్థమై పోయింది. దీంతో మళ్లీ వెనక్కి తగ్గినట్లు కనిపిస్తోంది.

జాతీయ పార్టీలతో, యుపిఎ భాగస్వామ్య పక్షాలతో చర్చలు జరిపిన తర్వాతనే తెలంగాణపై నిర్ణయాన్ని వెల్లడిస్తామని కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ శుక్రవారం చెప్పి, తెలంగాణపై వెనక్కి తగ్గుతున్న విషయాన్ని చెప్పకనే చెప్పారు. రెండో ఎస్సార్సీకి సొంత పార్టీ నాయకుల నుంచే వ్యతిరేకత రావడం కాంగ్రెసు అధిష్టానం వెనక్కి తగ్గడానికి కారణమని అంటున్నారు. అధిష్టానానికి వీరవిధేయుడైన సర్వే సత్యనారాయణ కూడా తెలంగాణ తప్ప మరో ప్రత్యామ్నాయం కుదరదని, రెండో ఎస్సార్సీకి అంగీకరించేది లేదని అన్నారు. తెలంగాణ పార్టీ నాయకులను ఒప్పించడం కాంగ్రెసు అధిష్టానానికి పెద్ద సమస్యగా మారింది.

తమ పార్టీకి చెందిన తెలంగాణ నాయకులు అంగీకరిస్తే పార్టీ అధిష్టానానికి ఎవరు అంగీకరించినా అంగీకరించకపోయినా ఫరవా లేదు. తెలంగాణలో పెల్లుబుకే ఆందోళనల విషయంలో అనుసరించాల్సిన పద్ధతి ఏమిటో ఇప్పటికే ఓ నిర్ధారణకు వచ్చిన కాంగ్రెసు అధిష్టానం తమ పార్టీ నాయకుల వద్దే ఆగిపోతున్నట్లు తెలుస్తోంది. నిజానికి, తెలంగాణపై రెండు మూడు రోజుల్లో వెలువడుతుందని భావిస్తుండడం వల్లనే తెలంగాణ రాష్ట్ర సమితి (తెరాస)లోకి వలసలు ఆగిపోయినట్లు చెబుతున్నారు. మళ్లీ వలసలు ఊసు పైకి వచ్చే అవకాశాలున్నాయి.

Published On November 11, 2011