అయోమయం లేదు, సమైక్యమే: మంత్రి శైలజానాథ్

హైదరాబాద్: అయోమయం ఏమీ లేదని తాను సమైక్యాంధ్రకే కట్టుబడి ఉన్నానని సీమాంధ్రకు చెందిన మంత్రి శైలజానాథ్ స్పష్టం చేశారు. తెలంగాణపై జాతీయ స్థాయిలో చర్చలు జరగాలన్న కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ ప్రకటనను ఆయన స్వాగతించారు. జాతీయ ప్రయోజనాల దృష్ట్యా తెలంగాణపై అన్ని పార్టీలతో జాతీయ స్థాయిలో చర్చ అవసరమని ఆయన శనివారం మీడియా ప్రతినిధులతో అన్నారు. మిగతావాళ్లు ఏమైనా మాట్లడవచ్చు గానీ బాధ్యత గల జాతీయ పార్టీ నాయకులుగా తాము జాగ్రత్తగా వ్యవహరించాల్సి ఉంటుందని ఆయన అన్నారు.

రాష్ట్రాల విభజన అనేది శాస్త్రీయ పద్ధతిలో జరగాల్సి ఉంటుందని ఆయన అన్నారు. త్వరలో చేపట్టనున్న డిసిసి అధ్యక్ష నియామకాల్లో సామాజిక న్యాయాన్ని పాటించాలని ఆయన కోరారు. త్వరలో తాను పిసిసి అధ్యక్షుడు బొత్స సత్యనారాయణను కలిసి తమ వర్గానికి ప్రాధాన్యం ఇవ్వాలని కోరనున్నట్లు ఆయన తెలిపారు. రాజ్యాధికారానికి అన్ని వర్గాలవారు అర్హులేనని, అయితే ఎవరికి రావాల్సిన వాటా వారికి రావాలని ఆయన అన్నారు.

English summary

Minister from Seemandhra Sailajanath said that he is committed to United Andhra.