తెలంగాణ ఇప్పుడైతే ఇవ్వలేం: తేల్చేసిన ప్రధాని

By Pratap

Published: Sunday, November 13, 2011, 8:00 [IST]

న్యూఢిల్లీ : తెలంగాణ అంశంపై ప్రధాని మన్మోహన్ సంచలన ప్రకటన చేశారు. 'ఇప్పట్లో తెలంగాణ ఇవ్వలేం' అని చెప్పకనే చెప్పారు. సార్క్ సమావేశాలలో పాల్గొని శనివారం భారత్‌కు తిరిగి వస్తున్న ప్రధాని ప్రత్యేక విమానంలో మీడియా ప్రతినిధులతో మాట్లాడారు. పలు అంశాలపై అడిగిన ప్రశ్నలకు సమాధానం చెప్పారు. తెలంగాణ అంశంపై ప్రశ్నించినప్పుడు కాస్తా సంతోషంగానే తేల్చేశారు. 'తెలంగాణ సంక్లిష్టమైన సమస్య' అంటూనే, దాన్ని జాతీయ సమస్యగా అభివర్ణించారు. జాతీయ స్థాయిలో దీనిపై విస్తృత ఏకాభిప్రాయం రాలేదని కూడా అన్నారు. 'ఒక జాతీయ సమస్యపై పెనం నుంచి పొయ్యిలో పడేలా నిర్ణయం తీసుకోలేం' అన్నారు. ప్రతి ఒక్కరి ప్రయోజనాలను, ప్రజాభిప్రాయాన్ని దృష్టిలో ఉంచుకుని విస్తృతాభిప్రాయం కోసం ప్రయత్నిస్తున్నామని తెలిపారు.

వెంటనే తెలంగాణ ఇచ్చేయలేమని, విస్తృత ఏకాభిప్రాయం సాధించకుండా నిర్ణయాలు తీసుకుంటే పెనం మీది నుంచి పొయ్యిలోకి పడినట్లేనని ఆయన అన్నారు. తెలంగాణపై ఇప్పుడే చెప్పలేమని, కొన్ని ప్రాథమిక చర్చలు జరిగాయని, కానీ విస్తృత ఏకాభిప్రాయం సాధించామని చెప్పలేమని, ఇంకా కొంత దూరంలో ఉన్నామని ఆయన అన్నారు. ఆంధ్రప్రదేశ్‌లోని ఇతర ప్రాంతాల్లో అశాంతి నెలకొని ఉండగా తెలంగాణకు అంగీకరించడ సమస్యకు పరిష్కారం కాదని ఆయన అన్నారు సంబంధీకులందరినీ ఒక్కతాటిపైకి తెచ్చి సర్వామోద పరిష్కారానికి అంగీకరింపజేసేందుకు ఆచరణీయ మార్గాలను ఇప్పటికీ అన్వేషిస్తున్నామని ఆయన అన్నారు.

తెలంగాణపై ప్రధాని ప్రకటన చేసిన నేపథ్యంలో తదుపరి చర్యగా కాంగ్రెస్ వర్కింగ్ కమిటీ సమావేశం జరగనున్నట్లు తెలిసింది. ఈనెల 22న పార్లమెంటు శీతాకాల సమావేశాలు ప్రారంభం కానున్నాయి. బహుశా 21న సీడబ్ల్యూసీ భేటీ ఏర్పాటు చేస్తారని, దీనికి ముఖ్యమంత్రిని కూడా ఆహ్వానిస్తారని తెలిసింది. అదేవిధంగా యూపీఏ మిత్రపక్షాలతోనూ భేటీ జరపొచ్చని తెలిసింది. తెలంగాణతో సహా అనేక అంశాలపై మిత్రపక్షాలతో చర్చించే అవకాశముంది.

Published On November 13, 2011